आजचं हवामान: वारं फिरलं, आता फक्त 24 तास पावसाचे, मुंबईसह कोकणातून महत्त्वाचं अपडेट

महाराष्ट्रात गेल्या काही दिवसांपासून सुरु असलेला पाऊस आता हळूहळू ओसरताना दिसत आहे. कोकण किनारपट्टीवर अजूनही रिमझिम सरींची उपस्थिती कायम असली, तरी हवामान विभागाने आज कोणत्याही जिल्ह्यासाठी अलर्ट जारी केलेला नाही. त्यामुळे नागरिकांना आज थोडा पावसापासून दिलासा मिळण्याची शक्यता आहे. मात्र पावसाने पूर्णतः माघार घेतलेली नाहीये.

मुंबईत आज काही भागांमध्ये हलक्या स्वरूपाचा पाऊस पडण्याची शक्यता हवामान विभागाने व्यक्त केली आहे. काही ठिकाणी अधूनमधून रिमझिम सरी तर काही ठिकाणी दिवसभर ऊन पसरलेलं राहू शकतं. त्यामुळे आजचं हवामान मुंबईकरांसाठी मिक्स मूडचं असणार आहे. दिवसभरात कमाल तापमान 32 अंश सेल्सिअस तर किमान तापमान 25 अंश सेल्सिअसच्या आसपास राहील.

ठाणे आणि नवी मुंबईत सुद्धा हवामान ढगाळ ते रिमझिम स्वरूपाचं राहणार आहे. काही भागांमध्ये मध्यंतरी हलक्या सरींचा अंदाज आहे, तर इतर ठिकाणी ऊन पडण्याची शक्यता आहे. सकाळी आर्द्रता थोडी जास्त राहिल्याने हवेत गारवा आणि ओलसरपणा जाणवेल.

पालघर जिल्ह्यात हलक्या स्वरूपाचा पाऊस होण्याची शक्यता हवामान खात्याने वर्तवली आहे. काही किनारी भागांमध्ये सकाळच्या सुमारास हलक्या सरी, तर दुपारनंतर वातावरण ढगाळ राहू शकतं.

कोकण किनारपट्टीतील रायगड, रत्नागिरी आणि सिंधुदुर्ग या तीन जिल्ह्यांमध्ये रिमझिम स्वरूपाचा पाऊस सुरूच राहणार आहे. मात्र जोरदार पावसाचा धोका नसून वातावरण अधूनमधून ढगाळ आणि आर्द्रतेचं राहणार आहे. किनारी भागात वाऱ्याचा वेग हलका ते मध्यम राहील. संपूर्ण कोकणात आज कमाल तापमान 31 ते 33 अंश सेल्सिअस दरम्यान, तर किमान तापमान 24 ते 26 अंश सेल्सिअसच्या आसपास राहील.