संजय गांधी राष्ट्रीय उद्यानातून बोगदा, मग वन्यप्राण्यांचं काय? गोरेगाव-मुलुंड लिंक रोडबाबत महत्त्वाचं अपडेट

हा जोडरस्ता गोरेगाव येथील चित्रनगरी परिसरापासून सुरू होऊन मुलुंडपर्यंत जाणार आहे. या मार्गामुळे मुंबईच्या पूर्व आणि पश्चिम उपनगरांमधील थेट संपर्क प्रस्थापित होणार आहे. त्यामुळे सध्या मोठा वळसा घालून करावा लागणारा प्रवास कमी होऊन प्रवाशांचा वेळ आणि इंधन दोन्हीची बचत होणार आहे.

या प्रकल्पामध्ये चित्रनगरी परिसरात सुमारे 1.32 किलोमीटर लांबीचा पेटी बोगदा उभारण्यात येत आहे. त्याचबरोबर या बोगद्याला जोडणारे रस्ते आणि इतर पायाभूत सुविधा उभारण्याचे कामही प्रकल्पात समाविष्ट आहे.

या प्रकल्पासाठी कंत्राटदाराची नियुक्ती करण्यात आली असून नोव्हेंबर 2023 पासून प्रत्यक्ष बांधकामाचे काम सुरू झाले आहे. सध्या बोगदा आणि जोडरस्त्यांच्या कामांना गती देण्यात आली आहे.

राष्ट्रीय वन्यजीव मंडळाने या प्रकल्पाला पूर्वी काही अटींसह मंजुरी दिली होती. त्या अटींनुसार संरक्षित क्षेत्रात मानवी आणि वन्यजीव संघर्ष टाळण्यासाठी तसेच वन्यजीव संवर्धनासाठी स्वतंत्र योजना तयार करणे आवश्यक आहे. त्यानुसार संजय गांधी राष्ट्रीय उद्यान तसेच तुंगारेश्वर अभयारण्य परिसरात मानवी-वन्यजीव संघर्ष निवारण आणि वन्यजीव संवर्धन योजना राबविण्यात येणार आहे. या योजनांची अंमलबजावणी राज्याचे मुख्य वनसंरक्षक आणि संजय गांधी राष्ट्रीय उद्यानाचे संचालक यांच्या मार्गदर्शनाखाली करण्यात येणार असल्याची माहिती प्रशासनाने दिली आहे.