IMD Monsoon Update : महाराष्ट्रात आज पुन्हा मुसळधार; पाऊस झोडपणार, 12 जिल्ह्यांना हायअलर्ट

महाराष्ट्रात पुन्हा एकदा परतीच्या पावसाचा जोर वाढला आहे, गेले दोन दिवस राज्यात परतीचा पाऊस चांगलाच बरसला, दरम्यान आज देखील राज्यात हवामान विभागाकडून मुसळधार पावसाचा इशारा देण्यात आला आहे.

परतीच्या पावसामुळे शेतकऱ्यांना मोठा फटका बसला आहे, मात्र अजूनही पुढील दोन ते तीन दिवस राज्यात पावसाचा जोर कायम असेल असा अंदाज हवामान विभागाकडून वर्तवण्यात आला आहे.

हवामान विभागाकडून देण्यात आलेल्या माहितीनुसार आज कोकणात वादळी वारा आणि विजांच्या कडकडाटासह पाऊस पडण्याची शक्यता आहे. कोकणातील पालघर, रत्नागिरी, सिंधुदुर्ग या जिल्ह्यांना मुसळधार पावसाचा इशारा देण्यात आला आहे.

दुसरीकडे आज विदर्भात देखील हवामान विभागाकडून जोरदार पावसाचा इशारा देण्यात आला आहे, विदर्भातील यवतमाळ, गडचिरोली आणि चंद्रपूर जिल्ह्यामध्ये आज मध्यम ते मुसळधार पावसाची शक्यता आहे.

मराठवाड्यालाही पावसाचा इशारा देण्यात आला आहे, मराठवाड्यातील बीड, लातूर, धाराशिव आणि नांदेड या जिल्ह्यांमध्ये वादळी वाऱ्यासह पावसाची शक्यता असल्याचं हवामान विभागानं म्हटलं आहे.

पश्चिम महाराष्ट्रातही आज पाऊस कोसळणार आहे, सातारा, सांगली आणि कोल्हापूर जिल्ह्यांना हवामान विभागाकडून पावसाचा इशारा देण्यात आला आहे.

मुंबई आणि उपनगरामध्ये देखील आज पावसाची शक्यता आहे, तर राज्याच्या उर्वरीत भागात आज ढगाळ वातावरण राहणार असल्याचं हवामान विभागानं म्हटलं आहे.