Weather Forecast: मुसळधार ते अतिमुसळधार पाऊस! पुणे, साताऱ्याला अलर्ट, पुढील 24 तासांचा हवामान अंदाज

राज्यात कोकण, घाटमाथा आणि विदर्भात पावसाचा जोर कायम आहे. पश्चिम महाराष्ट्रातील घाटमाथ्यावर मुसळधार पाऊस कोसळतो आहे. आज 27 जून रोजी देखील जोरदार पावसाची शक्यता कायम आहे. पुणे, सातारा आणि कोल्हापूर घाटमाथ्यावर मुसळदार पावसाचा अंदाज असून हवामान विभागाने सतर्कतेचा अलर्ट दिला आहे.

गेल्या काही काळात पुणे जिल्ह्यामध्ये पावसाचा जोर कमी झाला होता. मात्र हवापालट होवून पुढील 24 तासात शिवाजीनगर परिसरात मुसळधार ते खूप मुसळधार पावसाची शक्यता हवामान विभागाने वर्तवली आहे. तसेच तापमान 31 अंशावर पोहचण्याचा अंदाज आहे. पुणे जिल्ह्याच्या घाटमाथ्यावर देखील जोरदार पावसाची शक्यता असल्याने दक्षतेचा ऑरेंज अलर्ट हवामान विभागाने दिला आहे.

मागील 24 तासात कोल्हापूर जिल्हाभर जोरदार पाऊस कोसळला. कोल्हापूर परिसरात 12 मिलीमीटर पावसाची नोंद झाली. संततधार पावसाने धरणांची पाणीपातळी वाढत आहेत. पुढील 24 तासात घाटमाथ्यावर जोरदार पावसाची शक्यता कायम असून हवामान विभागाने यलो अलर्ट दिला आहे.

गेल्या 24 तासांत सातारा शहरात 3 मिलीमीटर पाऊस नोंदविण्यात आला. आज ढगाळ आकाशासह हलक्या पावसाचा अंदाज भारतीय हवामान विभागाने वर्तवला आहे. जिल्ह्याच्या घाटमाथ्यावर जोरदार पावसाची शक्यता असल्याने सतर्कतेचा ऑरेंज अलर्ट दिला आहे. पुढील 24 तासात कमाल तापमान 28 अंशावर राहील.

सोलापूर जिल्ह्यातील कमाल तापमान 31.1 अंशापर्यंत वाढले. जिल्ह्यात रिमझिम पाऊस असून 0.5 मिलिमीटर पावसाची नोंद झाली. पुढील 24 तासात हलक्या पावसाची शक्यता आहे. यावेळी पारा 33 अंशांवर जाण्याचा अंदाज आहे.

सांगली जिल्ह्यात गेल्या 24 तासांत 0.2 मिलिमीटर पावसाची नोंद झाली. जिल्ह्यातील बहुतांश परिसरास पावसाने उघडीप दिली. आज सांगली जिल्ह्यात ढगाळ आकाशासह हलक्या पावसाचा अंदाज आहे. यावेळी जिल्ह्यातील कमाल तापमान 30 तर किमान तापमान 23 अंश सेल्सिअस इतके राहील.

राज्यातील काही भागात पावसाचा जोर असताना पश्चिम महाराष्ट्रात मात्र मान्सूनची तीव्रता कमी आहे. पुढील काही काळ हीच स्थिती कायम राहणार असून घाटभागात पावसाचा जोर कायम राहील. त्यामुळे शेतकरी आणि नागरिकांना योग्य ते नियोजन करावे लागेल.