Weather Alert: पावसाचा कहर! सोमवारी 16 जिल्ह्यांवर अस्मानी संकट, 48 तासांसाठी हायअलर्ट

श्रावण महिन्याच्या दुसऱ्या आठवड्यापासून राज्यातील विविध भागांत पावसाचा जोर वाढला आहे. काही भागांत मुसळधार पाऊस झाला अशून काही भागातील शेतकरी पावसाच्या प्रतिक्षेत आहे. गेल्या 2 दिवसांत पावसाची तीव्रता पुन्हा वाढली आहे. 18 ऑगस्ट रोजी काही जिल्ह्यांत मुसळधार ते अतिमुसळधार पावसाची शक्यता आहे. 5 जिल्ह्यांना रेड तर 11 जिल्ह्यांना ऑरेंज अलर्ट जारी केला आहे. पुढील 24 तासांचा हवामान अंदाज जाणून घेऊ.

मुंबईसह पालघर, ठाणे आणि सिंधुदुर्ग जिल्ह्यांत मुसळधार ते अति मुसळधार पावसाचा इशारा देण्यात आला आहे. या चारही जिल्ह्यांसाठी पावसाचा ऑरेंज अलर्ट जारी करण्यात आला आहे. तर रायगड आणि रत्नागिरी जिल्ह्यांत अति मुसळधार पावसाची शक्यता असल्याने हवामान विभागाकडून रेड अलर्ट देण्यात आला आहे.

पश्चिम महाराष्ट्रातील पुणे, कोल्हापूर आणि सातारा घाटमाथा परिसरात मुसळधार ते अति मुसळधार पावसाची शक्यता आहे. याठिकाणी पावसाचा रेड अलर्ट जारी करण्यात आला आहे. तर पुणे, सातारा, सोलापूर या जिल्ह्यांत मुसळधार पावसाची शक्यता असल्याने यलो अलर्ट आहे. कोल्हापूर, सांगली जिल्ह्यांत मध्यम स्वरूपाच्या पावसाची शक्यता आहे.

मराठवाड्यातही पावसाचा जोर वाढलेला दिसून येत आहे. छत्रपती संभाजीनगर, जालना, बीड, लातूर या जिल्ह्यांत मुसळधार ते अति मुसळधार पावसाची शक्यता असल्याने ऑरेंज अलर्ट जारी करण्यात आला आहे. तर परभणी, हिंगोली, नांदेड, धाराशिव याठिकाणी वादळी वाऱ्यासह आणि विजांच्या कडकडाटासह पावसाची शक्यता वर्तवण्यात आली आहे. या जिल्ह्यांसाठी पावसाचा यलो अलर्ट असणार आहे.

उत्तर महाराष्ट्रातील नाशिक, धुळे, नंदुरबार, अहिल्यानगर या जिल्ह्यांत वादळी वाऱ्यासह आणि विजांच्या कडकडाटासह पावसाची शक्यता वर्तवण्यात आली आहे. या जिल्ह्यांसाठी पावसाचा यलो अलर्ट जारी करण्यात आला आहे. तर जळगाव जिल्ह्यांत मुसळधार ते अति मुसळधार पावसाची शक्यता असल्याने पावसाचा ऑरेंज अलर्ट हवामान विभागाकडून देण्यात आला आहे.

विदर्भातील नागपूर, अकोला, भंडारा, गोंदिया, बुलढाणा, वर्धा, वाशिम, यवतमाळ या जिल्ह्यांत वादळी वाऱ्यासह आणि विजांच्या कडकडाटासह मुसळधार पावसाची शक्यता हवामान विभागानं वर्तवली आहे. या सर्व जिल्ह्यांना पावसाचा यलो अलर्ट देण्यात आला आहे. अमरावती, चंद्रपूर, गडचिरोली या तीन जिल्ह्यांत मुसळधार ते अति मुसळधार पावसाची शक्यता असल्याने ऑरेंज अलर्ट हवामान विभागाकडून देण्यात आला आहे.

18 ऑगस्ट रोजी राज्यातील विविध भागांत मुसळधार पावसाची शक्यता वर्तवण्यात आली आहे. त्यामुळे नागरिकांनी आवश्यक ती काळजी घेणे गरजेचे आहे. पावसाचे वातावरण असताना बाहेर पडणे टाळावे. बाहेर असताना सुरक्षित ठिकाणी आसरा घ्यावा. शेतकऱ्यांनी पिकांची योग्य काळजी घ्यावी, असे आवाहन करण्यात आले आहे.