Weather Alert: महाराष्ट्रातील हवामानात मोठे बदल, पुणे ते कोल्हापूर धो धो कोसळणार, 5 जिल्ह्यांना अलर्ट

महाराष्ट्रातील हवामानात मोठे बदल जाणवत आहेत. ‘ऑक्टोबर हीट’चे चटके वाढलेले असतानाच दिवाळीच्या शेवटी राज्यात पाऊस पुन्हा सक्रीय झाला आहे. आज कोकण मराठवाड्यासह पश्चिम महाराष्ट्रातील 20 जिल्ह्यांत जोरदार पावसाची शक्यता आहे. पश्चिम महाराष्ट्रातील जिल्हानिहाय हवामान अंदाज जाणून घेऊ.

पुणे जिल्ह्यात बुधवारी 32.7 अंश सेल्सिअस कमाल तापमानाची तसेच 0.7 मिलीमीटर पावसाची नोंद झाली. आज पुणे जिल्ह्यात ढगाळ हवामान आणि एक दोन वेळा गडगडाटी पावसाची शक्यता आहे. यावेळी कमाल तापमानाचा पारा 33 अंशावर राहील. कमाल तापमानात अंशतः वाढ होऊन विजांसह पावसाची शक्यता आहे.

गेल्या 24 तासात सातारा जिल्ह्यातील कमाल तापमान 32.4 अंश सेल्सिअस इतके राहील. आज संपूर्ण साताऱ्यासह घाटमाथ्यावर विजांसह पावसाची शक्यता भारतीय हवामान विभागाकडून वर्तवण्यात आली आहे. यावेळी कमाल तापमानाचा पारा 31 अंशावर राहील.

कोल्हापूर जिल्ह्यात बुधवारी 29.7 अंश सेल्सिअस तापमानाची नोंद झाली. तसेच 12 मिलिमीटर पावसाची नोंद झाली. पुढील 24 तासात कोल्हापूरसह घाटमाथ्यावर वादळी वाऱ्यासह पावसाची शक्यता असल्याने दक्षतेचा यलो अलर्ट देण्यात आला आहे. यावेळी कमाल तापमान 31 अंश सेल्सिअस इतके राहील.

बुधवारी सोलापूर जिल्ह्यात 33.8 अंश सेल्सिअस कमाल तापमानाची नोंद झाली. आज जिल्ह्यात ढगांच्या गडगडाटासह हलक्या पावसाची शक्यता वर्तवण्यात आली आहे. यावेळी पारा 32 अंशावर राहण्याचा अंदाज हवामान विभागाकडून वर्तवण्यात आला आहे.

सांगली जिल्ह्यात मागील 24 तासात 31.2 अंश सेल्सिअस तापमानाची नोंद झाली. आज जिल्ह्यात विजांसह पावसाची शक्यता हवामान विभागाकडून यलो अलर्ट देण्यात आला आहे. यावेळी पारा 31 अंशावर राहण्याचा अंदाज आहे.

आज संपूर्ण पश्चिम महाराष्ट्रात विजांसह पावसाची शक्यता वर्तवण्यात आली आहे. तसेच उर्वरित राज्यात तुरळक ठिकाणी विजांसह पावसाचा अंदाज आहे. पुढील काही दिवस पावसाचा जोर राहणार असून 3 – 4 दिवस विजांसह मुसळधार पावसाचा यलो अलर्ट देण्यात आला आहे.