Weather Alert: रविवारी अवकाळी संकट! पुणे ते कोल्हापूर धो धो पाऊस, पश्चिम महाराष्ट्राचं हवामान अपडेट

अरबी समुद्रातील कमी दाब क्षेत्रांचा प्रभाव कमी झाल्याने राज्यात पावसाचा जोर ओसरत आहे. आज 2 नोव्हेंबर रोजी दक्षिण कोकण, मध्य महाराष्ट्र, मराठवाड्यात तुरळक ठिकाणी विजांसह पावसाची शक्यता आहे. उर्वरित राज्यात ढगाळ हवामानासह कमाल-किमान तापमानात चढ-उतार जाणवतील. पश्चिम महाराष्ट्रातील हवामान स्थितीबाबत जाणून घेऊ.

पुणे जिल्ह्यात शनिवारी 1.5 मिलिमीटर पावसाची नोंद झाली. तर आज पुणे जिल्ह्यात विजांसह हलक्या पावसाची शक्यता हवामान विभागाकडून वर्तवण्यात आली आहे. तसेच आज कमाल तापमानाचा पारा 29 अंशावर राहील.

गेल्या 24 तासात सातारा जिल्ह्यात 25.6 अंश सेल्सिअस कमाल तापमानाची आणि 2 मिलिमीटर पावसाची नोंद झाली. आज संपूर्ण साताऱ्यासह घाटमाथ्यावर मेघगर्जनेसह हलक्या पावसाची शक्यता भारतीय हवामान विभागाकडून वर्तवण्यात आली आहे. यावेळी कमाल तापमानाचा पारा 27 अंशावर राहील.

कोल्हापूर जिल्ह्यात शनिवारी 26.5 अंश सेल्सिअस तापमानाची आणि 2 मिलिमीटर पावसाची नोंद झाली. पुढील 24 तासात कोल्हापूरसह घाटमाथ्यावर विजांसह हलक्या पावसाची शक्यता आहे. यावेळी पारा 26 अंशावर राहिल.

सोलापूर जिल्ह्यात शनिवारी तापमानाचा पारा 32 अंश सेल्सिअस वर राहिला. तर काही ठिकाणी तुरळक पावसाने हजेरी लावली. आज ढगाळ आकाशासह हलक्या पावसाची शक्यता वर्तवण्यात आली आहे. यावेळी पारा 33 अंशावर पोहचण्याचा अंदाज आहे.

सांगली जिल्ह्यात मागील 24 तासात 5 मिलिमीटर पावसाची नोंद झाली. तसेच 25.9 अंश सेल्सिअस तापमान नोंदवलं गेलं. तासगाव, कवठेमहांकाळ परिसरात अवकाळी पावसाने काढणीत आलेल्या शाळू व इतर कडधान्य पिकांचे नुकसान केले. आज जिल्ह्यात ढगाळ आकाशासह हलक्या पावसाची शक्यता हवामान विभागाकडून वर्तवण्यात आली आहे.

पश्चिम महाराष्ट्रातील पुणे, सातारा आणि कोल्हापूर जिल्ह्यांमध्ये विजांसह पावसाची शक्यता आहे. सांगली, सोलापूरसह उर्वरित राज्यात ढगाळ हवामानासह कमाल-किमान तापमानात चढ-उतार जाणवतील. तसेच काही ठिकाणी अवकाळी पाऊस हजेरी लावण्याची शक्यता आहे. त्यामुळे शेतकऱ्यांना योग्य ती काळजी घ्यावी लागेल.