Weather Alert: राज्यात शनिवारचा दिवस मुसळधार पावसाचा, 20 जिल्ह्यांना हवामान विभागाचा अलर्ट

राज्यातील रायगड, रत्नागिरी, आणि सिंधुदुर्ग जिल्ह्यांत तसेच सह्याद्रीच्या घाटमाथ्यावर, त्याचबरोबर बुलढाणा, अकोला आणि अमरावती जिल्ह्यांत पुढील काही तासांमध्ये मुसळधार पावसाची शक्यता भारतीय हवामानशास्त्र विभागाने वर्तवली आहे.

त्याचबरोबर 28 जून रोजीसाठी राज्यातील अनेक जिल्ह्यांना मुसळधार पावसाचा इशारा हवामान विभागाने दिला आहे. पाहुयात 28 जून रोजी राज्यातील हवामानाची स्थिती कशी असेल.

मुंबई शहरामध्ये ढगाळ आकाश राहून काही ठिकाणी मुसळधार पावसाची शक्यता आहे. त्याचबरोबर कोकणातील सर्व जिल्ह्यांत तुरळक ठिकाणी मुसळधार पावसाची शक्यता भारतीय हवामानशास्त्र विभागाने वर्तवली असून यलो अलर्ट देण्यात आला आहे.

तर सह्याद्रीच्या घाटमाथ्यावर मुसळधार पावसाची शक्यता कायम असणार आहे. पश्चिम महाराष्ट्रातील पुणे, सातारा, सांगली, सोलापूर आणि कोल्हापूरमध्ये तुरळक ठिकाणी हलका ते मध्यम पाऊस होऊ शकतो. त्याचबरोबर उत्तर महाराष्ट्रातील नाशिक, धुळे, नंदुरबार, जळगाव आणि अहिल्यानगरमध्ये देखील काही ठिकाणी हलक्या ते मध्यम पावसाची शक्यता आहे.

मराठवाड्यातील जालना, संभाजीनगर बरोबरच सर्व जिल्ह्यांत हलक्या ते मध्यम पाऊस होण्याची शक्यता भारतीय हवामानशास्त्र विभागाने वर्तवली आहे.

विदर्भात नागपूर, अमरावती, बरोबरच विदर्भातील उर्वरित सर्व जिल्ह्यांत वादळी वाऱ्यासह आणि विजांच्या कडकडाटासह मध्यम पाऊस होऊ शकतो. सर्व जिल्ह्यांना पावसाचा यलो अलर्ट देण्यात आला आहे.

एकंदरीत कोकणातील जिल्हे आणि सह्याद्रीच्या घाटमाथ्यावर मुसळधार पाऊस होणार आहे, तर विदर्भातील सर्व जिल्ह्यांत हलक्या ते मध्यम पावसाची शक्यता भारतीय हवामानशास्त्र विभागाने वर्तवली आहे.