Pune Weather: पुणे घाटमाथ्यावर पावसाचा रेड अलर्ट, पश्चिम महाराष्ट्रातही पुढील 24 तास धोक्याचे!

मान्सून साठी पोषक हवामान झाल्याने कोकण, घाटमाथ्यासह राज्यात पावसाचा जोर वाढण्याची शक्यता आहे. आज 6 जुलै रोजी पुण्याच्या घाटमाथ्यावर मुसळधार पावसाचा अंदाज असल्याने सावधानतेचा रेड अलर्ट तर कोकण, घाटमाथ्यासह जोरदार पावसाची शक्यता असल्याने दक्षतेचा ऑरेंज अलर्ट देण्यात आला आहे.

पुणे जिल्ह्यातील पावसाचा जोर अधिक राहिला. धरणक्षेत्रात पावसाचा जोर पुन्हा वाढला आहे. तर घाटमाथ्यावर जोरदार पाऊस कोसळत आहे. मागील 24 तासात पुण्याच्या शिवाजीनगर परिसरात 3 मिलिमीटर पावसाची नोंद झाली. यावेळी कमाल तापमान 272 अंश सेल्सिअस राहिले. पुढील 24 तासात पुणे घाटमाथ्यावर मुसळधार पावसाची शक्यता असल्याने सावधानतेचा रेड अलर्ट देण्यात आला आहे.

कोल्हापूर जिल्ह्यात पावसाचा जोर चांगला राहिला. कोल्हापूर परिसरात 5 मिलीमीटर पाऊस नोंदविण्यात आला. संततधार पावसाने धरण आणि नद्यांच्या पाणीपातळीत वाढ होऊ लागली आहे. यावेळी कमाल तापमान 27.1 अंश सेल्सिअस एवढे होते. पुढील 24 तासात कमाल तापमान 27 अंशावर स्थिर राहिल. तसेच कोल्हापूर घाटमाथ्यावर मुसळधार पावसाची शक्यता असल्याने सतर्कतेचा ऑरेंज अलर्ट हवामान विभागाकडून वर्तवण्यात आला आहे.

सातारा जिल्ह्यात मागील 24 तासात जोरदार पाऊस कोसळला. सातारा परिसरामध्ये 9 मिलिमीटर पावसाची नोंद झाली. पुढील 24 तासात साताऱ्यातील कमाल तापमान 27 अंश सेल्सिअस राहिल. सातारा जिल्ह्यामध्ये ढगाळ आकाशासह मध्यम पावसाची शक्यता हवामान विभागाने वर्तवली आहे. घाटमाथ्यावर मात्र जोरदार पावसाचा ऑरेंज अलर्ट देण्यात आला आहे.

सोलापूर जिल्हात मागील 24 तासात 0.1 मिलीमीटर पाहसाची नोंद झाली. यावेळी जिल्ह्यातील कमाल तापमान 31.9 अंश सेल्सिअस राहिले. पुढील 24 तासात कमाल तापमानाचा पारा 32 अंशावर राहणार असून तुरळक ठिकाणी हलक्या पावसाची शक्यता आहे.

मागील 24 तासात सांगली जिल्ह्यात 2 मिलिमीटर पावसाची नोंद झाली. जिल्ह्याच्या शिराळा परिसरात जोरदार पाऊस सुरू असल्यामुळे चांदोली धरणाच्या पाणी पातळीत वाढ झाली. चांदोली धरणाचे चारही वक्र दरवाजे 0.25 मीटरने उघडले आहेत. 2879 क्युसेक पाण्याचा विसर्ग सुरू असल्याने वारणा नदीच्या पाणी पातळीत वाढ होणार आहे यामुळे नदीकाठच्या गावांना सतर्कतेचा इशारा दिला आहे.

पुढील 24 तासात सांगली जिल्ह्यात ढगाळ आकाशासह मध्यम पावसाचा अंदाज आहे. यावेळी जिल्ह्यातील कमाल तापमान 28 तर किमान तापमान 22 अंश सेल्सिअस इतके राहील. मान्सूनला पोषक हवामान झाल्याने राज्यात पावसाचा जोर वाढण्याची शक्यता आहे. कोकण, पश्चिम महाराष्ट्रच्या घाटमाथ्यावर पावसाचा जोर कायम असल्याने काही ठिकाणी अतिवृष्टीची नोंद होत आहे. धरण क्षेत्रातील पावसाने नद्यांच्या पाणी पातळीत देखील वाढ होत आहे.