Weather Alert: रेनकोट काढा अन् स्वेटर घाला, पश्चिम महाराष्ट्रात हवापालट, रविवारचं हवामान अपडेट

कोरडे हवामान, निरभ्र आकाश आणि उत्तरेकडील थंड हवा महाराष्ट्राकडे आल्याने राज्याच्या किमान तापमनात घट होत आहे. राज्यात अनेक ठिकाणी पारा 14 अंशांच्या खाली घसरल्याने गारठा वाढला आहे. आज 9 नोव्हेंबर रोजी राज्यात मुख्यतः कोरड्या हवामानासह किमान तापमनातील घसरण कायम राहण्याची शक्यता आहे.

कोल्हापूरकरांच्या दिवसाची सुरुवात साधारण 19 अंश सेल्सिअसच्या तापमानाने होईल. जसजसा दिवस पुढे जाईल तसतसे कमाल तापमान 30 अंश सेल्सिअसवर जाण्याची शक्यता आहे. कोरडे हवामान, स्वच्छ आकाश असल्याने पहाटेच्या वेळी किमान तापमानात घट होऊ लागली आहे.

पुणे जिल्ह्यात थंडीचा जोर वाढत आहे. शनिवारी 31.9 कमाल आणि 15.9 अंश सेल्सिअस किमान तापमानाचा पारा नोंदविण्यात आला. आज कमाल तापमान 31 तर किमान 14 अंशावर राहील. यावेळी निरभ्र आकाश राहण्याची शक्यता हवामान विभागाकडून वर्तवण्यात आली आहे.

साताऱ्यात गारठा वाढत असून, धुक्यासह दव पडल्याचे पाहायला मिळत आहे. शनिवारी 30.4 अंश सेल्सिअस कमाल आणि 17.1 किमान तापमान राहिले. आज सातारा जिल्ह्यात किमान आणि कमाल तापमान 15 आणि 31 अंश सेल्सिअस दरम्यान राहील.

सोलापूर जिल्ह्यात कमाल तापमानात अंशत: चढ-उतार होत आहेत. शनिवारी 32.6 अंश सेल्सिअस कमाल तापमानाची नोंद झाली. आज कमाल तापमानात वाढ होऊन पारा 33 अंशावर राहील. तसेच किमान तापमान 18 अंशावर राहिल.

सांगली जिल्ह्यात मागील 24 तासात 31.6 अंश सेल्सिअस कमाल तापमानाची नोंद झाली. आज जिल्ह्यात दिवसभर निरभ्र आकाशासह उन्हाचा पारा चढलेला राहील. तर सकाळी आणि संध्याकाळी हवेत गारवा जाणवेल.

राज्यात पावसाने ब्रेक घेतल्यानंतर हवामानात मोठे बदल जाणवत आहेत. पश्चिम महाराष्ट्रातील सर्व जिल्ह्यांत सकाळी आणि संध्याकाळी गारठा वाढत आहे. तर दुपारी उन्हाचे चटके सहन करावे लागत आहेत. पुढील काही काळ हवामानाची हीच स्थिती राहणार असून पारा आणखी घसरण्याची शक्यता आहे. त्यामुळे नागरिकांना योग्य ती काळजी घ्यावी लागेल.