Weather Alert: मान्सूनचा जोर ओसरला, सोलापूरचा पारा चढला, पुणे ते कोल्हापूर आजचा हवामान अंदाज

पूर्व विदर्भात जोरदार पाऊस कोसळत असला तरी उर्वरित राज्यात मात्र जोर कमी होत पावसाने उघडीप दिली आहे. आज 11 जुलै रोजी पश्चिम महाराष्ट्रातील सर्वच जिल्ह्यांत पाऊस उघडीप देण्याची शक्यता आहे. कोकण आणि पश्चिम महाराष्ट्राच्या घाटमाथ्यावर कोसळणाऱ्या पावसाचा जोर देखील कमी होण्याचा अंदाज आहे.

पुणे जिल्ह्यात गुरुवारी पावसाची रिपरिप राहिली. तर घाटमाथ्यावरील पावसाचा जोर कमी आहे. मागील 24 तासात पुण्याच्या शिवाजीनगर परिसरात 18.7 मिलिमीटर पावसाची नोंद झाली. यावेळी कमाल तापमान 29.2 अंश सेल्सिअस राहिले. पुढील 24 तासात पुण्यातील कमाल तापमान 30 अंशावर राहिल. हलक्या पावसाचा अंदाज हवामान विभागाने व्यक्त केला आहे.

सातारा जिल्ह्यात पावसाची तीव्रता ओसरला आहे. मागील 24 तासात सातारा परिसरामध्ये 0.8 मिलिमीटर पावसाची नोंद झाली. कोयना धरण पाणलोट क्षेत्रामध्ये मागील काही दिवसांपासून सुरू असलेला पावसाचा जोर ओसरला आहे. पुढील 24 तासात साताऱ्यातील कमाल तापमान 30 अंश सेल्सिअस राहील. ढगाळ आकाशासह हलक्या पावसाची शक्यता हवामान विभागाने वर्तवली आहे.

मागील 24 तासात कोल्हापूर परिसरामध्ये 0. 6 मिलीमीटर पाऊस नोंदविण्यात आला. यावेळी कमाल तापमानात वाढ नोंदविण्यात आली. पुढील 24 तासात कमाल तापमान 28 अंशावर राहील. तसेच पावसाचा जोर कमी राहून हलक्या पावसाचा अंदाज हवामान विभागाने व्यक्त केला आहे.

सोलापूर जिल्हात 3 मिलिमीटर पाऊस नोंदविण्यात आला. जिल्ह्यातील कमाल तापमानात वाढ होत आहे. मागील 24 तासात 33.3 अंश सेल्सियस तापमानाची नोंद झाली. आज कमाल तापमानाचा पारा 34 अंशावर जाण्याची शक्यता असून तुरळक ठिकाणी हलक्या पावसाची शक्यता आहे.

मागील 24 तासात सांगली जिल्ह्यात 0.3 मिलिमीटर पावसाची नोंद झाली. आज सांगली जिल्ह्यात ढगाळ आकाशासह हलक्या पावसाचा अंदाज आहे. यावेळी जिल्ह्यातील कमाल तापमान 23 तर किमान तापमान 30 अंश सेल्सिअस इतके राहील.

पश्चिम महाराष्ट्रात गेल्या काही काळापासून तुरळक हलका ते मध्यम पाऊस होतोय. आता मात्र हवापालट झाली असून यामध्ये घट झालीये. पुढील काही काळ हवामानाची हीच स्थिती कायम राहण्याचा अंदाज आहे. त्यामुळे शेतकरी आणि नागरिकांना योग्य ती काळजी घ्यावी लागेल.