आजचं हवामान: वादळी वारे वाहणार, गारपीट होणार; पुणे, सोलापूरवर आस्मानी संकट, 24 तास धोक्याचे!

राज्यात पूर्वमोसमी पावसाचा दणका सुरू आहे. आज 18 मे रोजी पुन्हा वादळी पावसाची शक्यता असल्याने 33 जिल्ह्यांना सतर्कतेचा येलो अलर्ट आहे. तसेच पश्चिम महाराष्ट्रातील पुणे जिल्ह्यात वादळी पाऊस, गारपीट होण्याची आणि सातारा, सांगली, सोलापूर जिल्ह्यांत वादळी वाऱ्याची शक्यता असल्याने दक्षतेचा ऑरेंज अलर्ट भारतीय हवामान विभागाने दिला आहे.

पश्चिम महाराष्ट्रातील बहुतांश ठिकाणी अवकाळी पावसामुळे तापमानात घसरण होत असली तरी उकाडा कायम आहे. पुणे जिल्ह्यात पूर्व मोसमी पावसाने हजेरी लावली. पुढील 24 तासात वादळी वाऱ्यासह गारपीटीची शक्यता असल्याने पुणे जिल्ह्यासाठी सतर्कतेचा इशारा दिला आहे. आज पुण्यातील कमाल तापमान 34 अंशांवर राहील.

मागील 24 तासात सातारा जिल्ह्यात 22 मिली मीटर पावसाची नोंद झाली. तसेच पुढील 24 तास देखील साताऱ्यासाठी सतर्कतेचे असून मुसळधार पावसाची शक्यता आहे. सातारा जिल्ह्यातील तापमान 33 अंश सेल्सिअस वर स्थिर राहून पाऊस पुन्हा झोडपणार आहे.

सांगली जिल्ह्याच्या वाळवा आणि शिराळा परिसरास अवकाळी पावसाने झोडपून काढले आहे. पुढील 24 तासात सांगलीत विजांच्या कडकडाटासह मुसळधार पावसाची शक्यता असून ताशी 40 ते 50 किलोमीटर वाऱ्याचा वेग असेल. कमाल तापमान 34 अंशावर राहून मुसळधार पावसाचा ऑरेंज अलर्ट जारी केला आहे.

सोलापूर जिल्ह्यात वादळी वाऱ्यासह जोरदार पावसाची शक्यता असल्याने सतर्कतेचा ऑरेंज अलर्ट दिला आहे. सोलापुरातील तुरळक ठिकाणी पावसाने जोर धरला असला तरीही कमाल तापमान 35 अंशावर स्थिर आहे.

कोल्हापूर जिल्ह्यात ढगाळ आकाश राहून मध्यम पाऊस किंवा गडगडाटी वादळाची शक्यता आहे. आज कमाल तापमान 34 अंशावर राहील. आज सकाळपासूनच कोल्हापुरात पावसाची रिपरिप सुरू आहे. पुढील काही दिवस हवामान स्थिती कायम राहणार आहे.

दरम्यान, पश्चिम महाराष्ट्रातील कोल्हापूर वगळता उर्वरित जिल्ह्यांना मुसळधार पावसाचा ऑरेंज अलर्ट भारतीय हवामान विभागाने जारी केला आहे. अवकाळी पावसामुळे शेतीचे मोठे नुकसान झाले आहे. पुढील 4 ते 5 दिवस राज्यात मुसळधार पावसाचा अलर्ट देण्यात आला आहे. त्यामुळे शेतकऱ्यांना योग्य ती काळजी घ्यावी लागेल.