Weather Alert : पुढील 24 तास महत्त्वाचे, पश्चिम महाराष्ट्रात गारपीटीची शक्यता, या 3 जिल्ह्यांना ऑरेंज अलर्ट

राज्यातील अनेक भागात गेल्या काही दिवसांपासून वादळी पावसाने जोरदार हजेरी लावली आहे. संपूर्ण पश्चिम महाराष्ट्रात धो धो वादळी पाऊस कोसळतो आहे. पुढील 24 तासांसाठी पश्चिम महाराष्ट्रातील तीन जिल्ह्यांत वादळी वाऱ्यासह जोमदार पावसाची शक्यता असल्याने हवामान विभागाने ऑरेंज अलर्ट जारी केला आहे. पुढील 24 तासातील पश्चिम महाराष्ट्रात असणारे जिल्हा निहाय हवामान अंदाज जाणून घेऊ.

सातारा जिल्ह्यात अवकाळी पावसाचा जोर कायम असून पुढील 24 तास देखील वादळी वाऱ्यासह मुसळधार पावसाची शक्यता असल्याने दक्षतेचा इशारा देण्यात आला आहे. गडगडाटी वादळासह साताऱ्यातील कमाल तापमान 33 अंश सेल्सिअस तर किमान तापमान 25 अंश सेल्सिअस राहिल.

सांगली जिल्ह्यात मेघगर्जनेसह जोरदार पाऊस असून पुढील 24 तास देखिल गडगडाटी वादळासह मध्यम पावसाची शक्यता आहे. 40 ते 50 किलोमीटर प्रतितास वेगाच्या वाऱ्याची शक्यता हवामान विभागाने दिली आहे. जिल्ह्यात मागील 24 तासात 7.2 मिलिमीटर पावसाची नोंद झाली.

सोलापूर जिल्ह्यात वादळी वाऱ्यासह मध्यम पावसाची शक्यता असल्याने सतर्कतेचा यलो अलर्ट हवामान विभागाने दिला आहे. सोलापुरातील तुरळ ठिकाणी मध्यम पाऊस असला तरीही मागील 24 तासात कमाल तापमान 36.6 अंश सेल्सिअस राहिले. तर पुढील 24 तासात कमल तापमान 35 अंशावर राहण्याचा अंदाज आहे.

कोल्हापूर जिल्ह्यात ढगाळ आकाश राहून मध्यम पाऊस किंवा गडगडाटी वादळाची शक्यता हवामान विभागाकडून वर्तवण्यात आली आहे. विजांच्या कडकडाटासह ताशी 40 ते 50 किलोमीटर वेगवान वाऱ्याची शक्यता आहे. पुढील 24 तास कोल्हापुरातील कमाल तापमान 32 अंश सेल्सिअस तर किमान तापमान 23 अंशांवर राहील.

पुणे जिल्ह्यातील विविध ठिकाणी पूर्व मोसमी पाऊस कोसळतो आहे. पावसाळी हवामानाने तापमानात घट झाली असून 33 अंश सेल्सिअस तापमान राहिले. तर पुढील 24 तासात वादळी वाऱ्यासह गारपीटीची शक्यता असल्याने पुणे सातारा, आणि कोल्हापूर जिल्ह्यासाठी सतर्कतेचा ऑरेंज अलर्ट भारतीय हवामान विभागाने दिला आहे.

अशातच वातावरणात गारवा पसरल्याने नागरिकांना उकाड्यापासून आराम मिळाला आहे. मात्र शेतीची कामे खोळंबली आहेत. पुढील काही दिवस वादळी पावसाचे वातावरण कायम असल्याने नागरिकांनी योग्य दक्षता घेणे गरजेचे आहे.