Pune Weather: विजा कडाडणार, पाऊस कोसळणार, पश्चिम महाराष्ट्रातील हवामान अंदाज

राज्यातील पावसाचा जोर ओसरला असून काही ठिकाणी हलका पाऊस पडतो आहे. आज दिनांक 4 ऑगस्ट रोजी विदर्भात विजांसह पावसाच्या सरींची शक्यता असल्याने सतर्कतेचा इशारा हवामान विभागाने दिला आहे. उर्वरित राज्यात अंशतः ढगाळ आकाश राहण्याचा, तसेच तुरळक ठिकाणी विजांसह हलक्या सरींचा अंदाज हवामान विभागाने व्यक्त केला आहे. पश्चिम महाराष्ट्रातील पुढील 24 तासातील हवामान कसं राहील पाहुयात.

पुणे जिल्ह्यात पावसाचा जोर कमी झाला आहे. घाटमाथ्यावर आणि धरणक्षेत्रात देखील पावसाने विश्रांती घेतली आहे. मागील 24 तासात पुणे जिल्ह्यात 1.1 मिलीमीटर पाऊस नोंदविण्यात आला. यावेळी कमाल तापमानाचा पारा 30.7 अंश सेल्सिअस होता. पुढील 24 तासात संपूर्ण पुणे जिल्ह्यात हलक्या पावसाची शक्यता आहे. कमाल तापमान 29 तर किमान तापमान 22 अंश सेल्सिअस इतके राहील.

सातारा जिल्ह्यात मागील 24 तासात 0.6 मिलिमीटर पावसाची नोंद झाली. पुढील 24 तासात साताऱ्यातील कमाल तापमान 29 अंश सेल्सिअस राहील. सातारा जिल्ह्यात विजांच्या कडकडाटाची शक्यता हवामान विभागाने व्यक्त केली आहे.

कोल्हापूर जिल्ह्यात मागील 24 तासात 0.7 मिलीमीटर पावसाची नोंद झाली. यावेळी कमाल तापमान 29.1 अंश सेल्सिअस राहिले. पुढील 24 तासात कमाल तापमान 28 अंशावर राहील. कोल्हापूर जिल्ह्यात विजांच्या गडगडाटासह एक-दोन वेळा तुरळक पाऊस पडेल.

सोलापूर जिल्ह्यात मागील 24 तासात पावसाची उघडीप राहिली. तसेच 32.0 अंश सेल्सिअस कमाल तापमानाची नोंद झाली. पुढील 24 तासात कमाल तापमान 33 अंशावर जाण्याची शक्यता आहे. तसेच पुढील 24 तासात सोलापूर जिल्ह्यात विजांसह पावसाची शक्यता असल्याने सतर्कतेचा यलो अलर्ट भारतीय हवामान विभागाकडून वर्तवण्यात आला आहे.

मागील 24 तासात सांगली जिल्ह्यामध्ये 0.8 मिलीमीटर पावसाची नोंद झाली. पुढील 24 तासात ढगाळ आकाशासह हलक्या पावसाची शक्यता हवामान विभागाने वर्तवली आहे. यावेळी जिल्ह्यातील कमाल तापमान 31 तर किमान तापमान 22 अंश सेल्सिअस इतके राहील. ढगांच्या गडगडाटासह आकाश ढगाळ राहील.

पश्चिम महाराष्ट्रात पावसाच्या उघडिपीसह तापमानात चढ-उतार सुरूच आहेत. उर्वरित राज्यात अंशतः ढगाळ आकाश राहण्याचा, तसेच तुरळक ठिकाणी विजांसह हलक्या सरींचा अंदाज आहे.