Lalbaugcha Raja: ‘लालबागचा राजा’च्या दर्शनासाठी रांगा, यंदाच्या गणेशोत्सवात खास थीम, PHOTOS

गणेशोत्सवाला गणेश चतुर्थीपासून प्रारंभ होत असून ‘नवसाला पावणारा गणपती’ म्हणून ओळखल्या जाणाऱ्या लालबागच्या राजाच्या दर्शनासाठी पहिल्याच दिवसापासून प्रचंड गर्दी उसळते. हजारो भाविक गणेश चतुर्थीच्या आदल्या दिवसापासूनच रांगेत थांबतात आणि प्रतिष्ठापनेनंतरच्या सकाळपासून चरणस्पर्श व मुखदर्शनासाठी अखंड रांग सुरु असते. मुंबईतूनच नव्हे तर राज्यभरातून आणि देशाबाहेरूनही भाविक लालबागच्या राजाच्या दर्शनासाठी येत असतात.

यंदा प्रथमच लालबागच्या राजाच्या दरबाराची उंची वाढवण्यात आली आहे. त्यामुळे संपूर्ण देखावा अधिक विराट व दिमाखदार दिसत आहे. सुवर्ण कमानी, कलात्मक शिल्पकला आणि प्रकाशयोजनेमुळे दरबारात प्रवेश करताना भाविकांना वेगळ्याच जगात आल्याचा भास होत आहे. ही नवलाई यावर्षीच्या उत्सवाचे मोठे आकर्षण ठरत आहे.

2025 साली लालबागच्या राजाचा दरबार ‘तिरुपती बालाजीच्या राजमुकुटा’च्या थाटात सजवण्यात आला आहे. यासाठी खास ‘सुवर्ण गजानन महाल’ उभारला असून, मंडपाचे डिझाइन उंच व भव्य ठेवण्यात आले आहे. तिरुपतीच्या वैभवाची झलक आणि गणरायाच्या दरबारातील राजेशाही थाट यांचा संगम यंदा पाहायला मिळत आहे.

लालबागच्या राजाची प्रतिष्ठापना आज पहाटे 5:00 वाजता अध्यक्ष बाळासाहेब कांबळे यांच्या हस्ते झाली असून सकाळी 6:00 वाजता रांगा खुल्या झाल्या. लालबागच्या राजाच्या दर्शनासाठी दोन प्रमुख रांगा आहेत. ‘नवसाची’ रांग (चरणस्पर्श) आणि ‘मुखदर्शनाची’ रांग. प्रत्यक्ष येणाऱ्या भाविकांसोबतच देश-विदेशातील भक्तांसाठी मंडळाने ऑनलाईन दर्शनाची सोय उपलब्ध करून दिली आहे, जी आजपासून अनंत चतुर्दशीपर्यंत अखंड सुरू राहणार आहे.

लालबागच्या राजाची मूर्ती यंदा वात्सल्याने भरलेली असून तिला सोनेरी अलंकारांनी सजवले आहे. सोन्याच्या पादुका, दिमाखदार राजमुकुट, आणि इतर सुवर्ण अलंकार यांच्या तेजाने मूर्ती अधिकच मोहक भासत आहे. राजाच्या या राजेशाही थाटाने भाविक मंत्रमुग्ध होत असून, प्रत्यक्ष दर्शन घेण्यासाठी गर्दी उसळली आहे.