T20 World Cup : श्रीलंकेकडून 'करेक्ट कार्यक्रम' पण ऑस्ट्रेलिया अजूनही सुपर 8 मध्ये जाऊ शकते, पाहा कसं?

श्रीलंकेच्या संघाने टी-20 वर्ल्ड कप 2026 च्या सुपर-8 फेरीत धडाक्यात एन्ट्री केली आहे. पाथुम निसंका याने झळकावलेल्या ऐतिहासिक नाबाद शतकाच्या जोरावर श्रीलंकेने हा टप्पा गाठला असून, असा पराक्रम करणारा हा तिसरा संघ ठरला आहे.

श्रीलंकेच्या ऑस्ट्रेलियावरील विजयामुळे क्रिकेट जगतात मोठी खळबळ उडाली असून बलाढ्य ऑस्ट्रेलियाच्या स्पर्धेतील अस्तित्वावर आता प्रश्नचिन्ह निर्माण झाले आहे. ऑस्ट्रेलिया जवळजवळ वर्ल्ड कपमधून बाहेर झालीये.

झिम्बाब्वेपाठोपाठ श्रीलंकेकडून मिळालेल्या या पराभवामुळे आता ऑस्ट्रेलियाला एकच गोष्ट सुपर 8 मध्ये पोहोचवू शकते, ती म्हणजे आर्यलँडचा विजय... ऑस्ट्रेलियाला सुपर 8 मध्ये पोहोचण्यासाठी दुसऱ्या संघावर अवलंबून रहावं लागणार आहे.

ऑस्ट्रेलियाला पाणी पाजणाऱ्या झिम्बॉब्वे संघाचा आगामी सामना आर्यलँडशी होणार आहे. जर या सामन्यात झिम्बॉब्वेने विजय मिळवला तर ते थेट सुपर 8 मध्ये पोहोचतील तर ऑस्ट्रेलियाला गाशा गुंडाळावा लागेल.

पण जर आर्यलँडने बाजी मारली तर ऑस्ट्रेलियाला सुपर 8 मध्ये पोहोचण्यासाठी काहीही करून मोठ्या फरकाने ओमानला धूळ चारावी लागेल. दोन मॅचनंतर झिम्बॉब्वेचा नेट रनरेट +1.984 आहे.

तीन सामन्यातील दोन पराभवानंतर देखील ऑस्ट्रेलियाचा नेट रनरेट +0.414 आहे. त्यामुळे ऑस्ट्रेलियासाठी हा मोठा प्लस पाईंट आहे. त्यामुळे आता कांगारू मागील वनडे वर्ल्ड कपप्रमाणे यंदाही बाजी मारणार का? असा सवाल विचारला जातोय.

दरम्यान, आज झिम्बॉब्वे आणि आर्यलँड यांच्यात सामना होईल. हा सामना पाहण्यासाठी आम्ही सज्ज आहेत, असं ऑस्ट्रेलियाचा कॅप्टन मिशेल मार्श याने म्हटलं आहे.