BCCIने जाहीर केली नवी टीम, ऐतिहासिक बदल; IPL खेळलेला स्टार आता सुपरबॉस

भारतीय क्रिकेट कंट्रोल बोर्ड (BCCI) च्या नव्या अध्यक्षपदाची घोषणा करण्यात आली आहे. अपेक्षेप्रमाणे दिल्लीचे माजी कर्णधार मिथुन मन्हास यांची रॉजर बिन्ना यांच्या जागी अध्यक्ष म्हणून निवड झाली आहे. मन्हास यांनी काही दिवसांपूर्वीच या पदासाठी अर्ज दाखल केला होता.

रविवार 28 सप्टेंबर रोजी ते मुंबईतील वानखेडे स्टेडियम येथे बीसीसीआयच्या मुख्यालयात पोहोचले होते. बीसीसीआयच्या वार्षिक सर्वसाधारण सभेत (AGM) त्यांच्या नावावर शिक्कामोर्तब करण्यात आले.

दिल्लीचे माजी कर्णधार मिथुन मन्हास भारतीय क्रिकेट कंट्रोल बोर्डाचे नवे अध्यक्ष झाले आहेत. बीसीसीआयची नवी कार्यकारिणी 28 सप्टेंबर रोजी झालेल्या AGM मध्ये घोषित करण्यात आली.

राजीव शुक्ला आणि देवजीत सैकिया यांची पुन्हा उपाध्यक्ष आणि सचिव म्हणून निवड झाली आहे. प्रभतेज सिंह भाटिया यांनी रोहन गोंस देसाई यांच्या जागी संयुक्त सचिवपद स्वीकारले आहे. भाटिया याआधी बीसीसीआयचे कोषाध्यक्ष होते. आता ए. रघुराम भट बीसीसीआयचे नवे कोषाध्यक्ष आहेत.

मिथुन मन्हास कोण आहेत? मन्हास यांना जम्मू आणि काश्मीर क्रिकेट असोसिएशन (JKCA) कडून नामनिर्देशित करण्यात आले होते. तिथे त्यांनी प्रशासक म्हणून काम पाहिले आहे. त्यांनी 1997/98 हंगामात फर्स्ट क्लास क्रिकेटमध्ये पदार्पण केले.

मन्हास यांनी भारत अंडर-19 आणि ‘ए’ संघाचेही प्रतिनिधित्व केले आहे. फर्स्ट क्लास क्रिकेटमध्ये उत्तम रेकॉर्ड असूनही त्यांना सिनियर संघात खेळण्याची संधी मिळाली नाही. त्या काळात भारतीय संघात सौरव गांगुली, व्हीव्हीएस लक्ष्मण, सचिन तेंडुलकर, राहुल द्रविड यांसारखे दिग्गज खेळाडू होते.

मन्हास यांनी 147 फर्स्ट क्लास सामने खेळले असून त्यांनी 45.82 च्या सरासरीने 9,714 धावा केल्या आहेत. त्यांच्या नावावर 27 शतके आणि 49 अर्धशतके आहेत. त्यांचा सर्वोत्तम रणजी हंगाम 2007-08 होता, जेव्हा दिल्लीने विजेतेपद मिळवले. त्या हंगामात त्यांनी 57.56 च्या सरासरीने 921 धावा केल्या होत्या.

लिस्ट-ए क्रिकेटमध्येही त्यांचा उत्तम रेकॉर्ड आहे. त्यांनी 130 सामने खेळले असून 45.84 च्या सरासरीने 4,126 धावा केल्या आहेत. यामध्ये 5 शतके आणि 26 अर्धशतके आहेत. ते ऑफ-स्पिन गोलंदाजीचेही तज्ज्ञ होते. त्यांच्या नावावर एकूण 75 बळी आहेत, ज्यात प्रथम श्रेणी क्रिकेटमधील 40 विकेट्स समाविष्ट आहेत. शिवाय ते विकेटकीपिंगही करू शकत होते.

मन्हास यांनी तीन IPL फ्रँचायझीसाठी खेळले आहे – दिल्ली डेअरडेव्हिल्स (आताचे दिल्ली कॅपिटल्स), बंद पडलेली पुणे वॉरियर्स इंडिया आणि चेन्नई सुपर किंग्ज (CSK). त्यांनी आयपीएलच्या उद्घाटन हंगामापासून 2014 पर्यंत खेळले. 55 सामन्यांत त्यांनी 22.34 च्या सरासरीने आणि 109.36 स्ट्राईक रेटने 514 धावा केल्या. त्यांच्या आयपीएल करिअरमध्ये एकही अर्धशतक नव्हते.