Ind vs Aus: स्पायडरमॅनशिवाय टीम इंडियाला खेळावा लागणार सामना, BCCI कडून हेल्थबाबत आली अपडेट

टीम इंडिया ऑस्ट्रेलिया दौऱ्यावर जाणार आहे. त्याआधी टीम इंडियाचं टेन्शन वाढवणारी बातमी आहे. स्पायडरमॅनशिवाय टीमला खेळावं लागणार आहे. टीम इंडियाचे खेळाडू त्याला खूप मिस करणार आहेत. त्याची प्रकृती अजूनही पाहिजे तेवढी सुधारली नसल्याने त्याला आराम देण्याचा निर्णय BCCI ने घेतला आहे. त्यामुळे चाहत्यांचीही थोडी नाराजी आहे. मात्र चाहते तो लवकर बरा व्हावा म्हणून प्रार्थना करत आहेत.

टीम इंडिया धडाकेबाज विकेटकीपर आणि बॅट्समन ऋषभ पंत आगामी ऑस्ट्रेलिया दौऱ्यापासून बाहेर राहणार आहे. भारत ऑस्ट्रेलियामध्ये 3 वन डे आणि 5 टी 20 सामन्यांची सीरिज खेळणार आहे. या सीरिजमधील पहिला वनडे सामना 19 ऑक्टोबरला पर्थमध्ये खेळला जाईल. मिडल ऑर्डरमध्ये पंतसारख्या आक्रमक खेळाडूच्या अनुपस्थितीमुळे, टीम इंडियाला मोठा फटका बसण्याची शक्यता आहे.

पंतला ही दुखापत याच वर्षी जुलैमध्ये इंग्लंड दौऱ्यावर झाली होती. ओल्ड ट्रॅफर्ड येथे झालेल्या कसोटी सामन्याच्या पहिल्याच दिवशी तो ख्रिस वोक्सच्या यॉर्करवर स्वीप मारताना पायाला दुखापत करून बसला. तेव्हा तो ३७ धावांवर रिटायर्ड हर्ट झाला होता.

या दुखापतीमुळे त्याला त्या मालिकेतील पाचवा कसोटी सामना, त्यानंतर झालेला आशिया चषक आणि वेस्ट इंडिजविरुद्धची सध्या सुरू असलेली दोन कसोटी सामन्यांची मालिका चुकवावी लागली. 'टाइम्स ऑफ इंडिया'च्या वृत्तानुसार, ऋषभ पंत गेल्या महिन्यात मुंबईत डॉक्टरांना भेटला होता.

बीसीसीआयच्या सूत्रांनी शनिवारी सांगितले की, त्याची प्रकृती पाहिजे त्या स्पीडने रिकव्हर होत नाही, त्यासाठी वेळ द्यावा लागेल. त्यामुळे ऑस्ट्रेलियातील Limited Overs आठ सामन्यांच्या दौऱ्यादरम्यान मधल्या फळीत त्याची मोठी कमतरता टीमला नक्कीच जाणवेल.

पंतचे आंतरराष्ट्रीय क्रिकेटमध्ये परतण्याचे संभाव्य वेळापत्रक आता १४ नोव्हेंबर पासून कोलकाता येथील ईडन गार्डन्सवर दक्षिण आफ्रिकेविरुद्ध सुरू होणारी पहिली कसोटी असू शकते. टी२० आशिया चषकात मधल्या फळीत त्याच्यासारख्या प्रभावी फलंदाजाची कमतरता भारताला जाणवली होती, तरीही संजू सॅमसनने त्या वेळी चांगली कामगिरी केली होती.

ऋषभला मैदानात परतण्यासाठी नोव्हेंबरपर्यंत वाट पाहावी लागू शकते. त्यामुळे तूर्तास तरी त्याला आराम देण्यात आला आहे. येणाऱ्या सामन्यांमध्ये त्याला संधी दिली जाणार नाही असं बीसीसीआयच्या सूत्रांनी सांगितलं आहे.