Thane Metro : ठाणे मेट्रो 4चा मार्ग ठरला! कॅडबरी जंक्शन ते गायमुख दरम्यान किती आणि कोणती स्थानके असणार?

ठाणेकरांसाठी दिलासादायक आणि अत्यंत महत्त्वाची बातमी आहे. अनेक वर्षांपासून प्रतीक्षेत असलेले ठाणे मेट्रोचे स्वप्न आता प्रत्यक्षात उतरण्याच्या मार्गावर आहे. ठाणे मेट्रो 4 सेवा लवकरच प्रवाशांच्या सेवेत दाखल होणार असून त्यासाठीच्या चाचणी प्रक्रिया वेगाने सुरू आहेत.

मेट्रो प्रकल्प 4 अंतर्गत पहिल्या टप्प्यात गायमुख ते कॅडबरी जंक्शनदरम्यान मेट्रो धावणार आहे. या मार्गावरील एकूण 10 मेट्रो स्थानकांचा समावेश पहिल्या टप्प्यात करण्यात आला आहे.

सुरुवातीला केवळ पहिल्या चार स्थानकांपर्यंत मेट्रोची यशस्वी चाचणी घेण्यात आली होती. आता राहिलेल्या सहा स्थानकांपर्यंत मेट्रोची ट्रायल रन प्रक्रिया सुरू असून तीही अंतिम टप्प्यात आहे.

सर्व तांत्रिक चाचण्या, सुरक्षा तपासण्या आणि सिग्नल प्रणालीची चाचणी पूर्ण झाल्यानंतर ही मेट्रो सेवा अधिकृतपणे सुरू केली जाणार आहे.

मेट्रो 4 सुरू झाल्यानंतर ठाणे शहरातील वाहतूक कोंडी मोठ्या प्रमाणात कमी होण्याची शक्यता आहे. विशेषतहा घोडबंदर रोडवरील प्रवाशांना याचा मोठा फायदा होणार आहे.

मेट्रो 4 च्या पहिल्या टप्प्यातील स्थानकांमध्ये कॅडबरी जंक्शन, माजीवाडा, कपूरबावडी, मानपाडा, टिकूजी-नी-वाडी, डोंगरी पाडा, विजय गार्डन, कासारवडवली, गव्हाणपाडा आणि गायमुख या स्थानकांचा समावेश आहे.

या मार्गामुळे ठाणे ते पश्चिम उपनगरांमधील प्रवास अधिक जलद, सुरक्षित आणि आरामदायी होणार आहे.