Cyber Crime : ऑनलाईन गॅस बिल भरणं पुण्यातील ज्येष्ठाला भोवलं; एक क्लिक अन् खात्यातून 23 लाख गायब

पुणे : पुणे शहरात सायबर चोरट्यांनी पुन्हा एकदा डोके वर काढले आहे. वेगवेगळ्या तीन घटनांमध्ये ज्येष्ठ नागरिक आणि महिलांना सुमारे ५७ लाख रुपयांचा गंडा घातला आहे. यातील पहिली धक्कादायक घटना औंध भागात घडली. यात एका ८३ वर्षीय ज्येष्ठ नागरिकाला गॅस देयक न भरल्यामुळे पुरवठा खंडित करण्याची भीती दाखवण्यात आली. सायबर भामट्यांनी त्यांच्या मोबाईलवर एक संशयास्पद लिंक पाठवून त्यावर माहिती भरण्यास सांगितले. जशी फिर्यादीने ती लिंक उघडली, तसे त्यांच्या बँक खात्यातून २२ लाख ९४ हजार रुपये परस्पर लंपास करण्यात आले. या प्रकरणी चतुःशृंगी पोलिसांनी गुन्हा दाखल केला असून गुन्हे शाखेच्या पोलीस निरीक्षक अश्विनी ननावरे या गुन्ह्याचा तपास करत आहेत.