बाई, हा काय प्रकार! साधं पांढरं अंडं सिंदूर लावताच बनतंय गावठी, खाताना सांभाळूनच

गावठी किंवा देशी अंडं आणि ब्रॉइलर चिकनचं अंडं... यात एक सामान्य फरक असतो तो म्हणजे रंगाचा. ब्रॉइलर चिकनचं अंडं पांढरं असतं, जे आपण नेहमी खातो आणि देशी अंडं हलकं ब्राऊन रंगाचं असतं. साध्या अंड्याच्या तुलनेत देशी अंडं महागही असतं. पण देशी अंडं आता अशा पद्धतीने बनवलं जातं आहे की तुम्ही विचारही केला नसेल.

साध्या पांढऱ्या अंड्याला सिंदूर लावून देशी अंडं बनवलं जात आहे. अन्न सुरक्षा विभागाने उत्तर प्रदेशच्या मुरादाबादमधील गोदामावर छापा टाकला आणि हा प्रकार उघडकीस आला. गुरुवारी शहरातील रामपूर दोराहा, बरवारा माजरा येथील एका गोदामावर हा छापा टाकण्यात आला. 4.53 लाख रंगीत अंडी आणि 3.56 लाख पांढरी अंडी जप्त करण्यात आली आहेत. अंड्यांची अंदाजे किंमत सुमारे 3.89 लाख इतकी होती.

पांढऱ्या अंड्यांना कृत्रिमरित्या रंगवून देशी अंडी म्हणून विकली जात होती. रंगासाठी कात, चहापावडर आणि सिंदूर यांचा वापर केला जात होता. अन्न पथकाच्या मते अंड्यांचा पृष्ठभाग देशी अंड्यांसारखा रंग देण्यासाठी कृत्रिम रंग वापरण्याची ही पद्धत बेकायदेशीर आहे. याचा ग्राहकांच्या आरोग्यावर विपरीत परिणाम होऊ शकतो. जर ते खाल्ले तर संसर्ग, ऍलर्जी आणि पोटाशी संबंधित समस्या होण्याची शक्यता असते.

विभागाच्या अधिकाऱ्यांच्या मते, देशी अंडी पांढऱ्या अंड्यांपेक्षा जास्त किमतीला विकतात. यामुळे नफ्याच्या आमिषाने काही व्यापारी कृत्रिम रंग वापरून ग्राहकांना फसवत आहेत. बाजारात एक पांढरं अंडं आठ ते नऊ रुपयांना आणि एक देशी अंडं 20 रुपयांना विकलं जात आहे.

गोदाम सील करण्यात आलं आहे आणि ऑपरेटरविरुद्ध गुन्हा दाखल करण्यात आला आहे. या गोदामातून रंगीत अंडी कोणत्या दुकानांनी पुरवली हे देखील तपासात निश्चित केलं जाईल, जेणेकरून संपूर्ण पुरवठा साखळीचा शोध घेता येईल. (सर्व फोटो प्रतीकात्मक)