General Knowledge : OK, OK म्हणता पण याचा खरा फुलफॉर्म काय माहितीये?

आपल्याला कोणी काही सांगितलं तर त्यावर होकार दर्शवण्यासाठी आपण सहज ओके म्हणतो. बोलताना, मेसेज करताना दिवसभरात कितीतरी वेळा हा शब्द आपण वापरतो. पण याचा अर्थ आणि फुलफॉर्म तुम्हाला माहिती आहे?

स्मिथसोनियन पत्रिकेत प्रसिद्ध झालेल्या एका लेखामध्ये दिलेल्या माहितीनुसार, OK हा शब्दच चुकीचा आहे. AC (All Correct) ऐवजी लोक चुकून OK (Oll Korrect) वापरू लागल्याचं यात म्हटलं आहे.

182 वर्षांपूर्वी अमेरिकन पत्रकार चार्ल्स गॉर्डन ग्रीन यांच्या लेखणीतून सर्वांत पहिल्यांदा OK हा शब्द जगासमोर आला. 1839 मध्ये कित्येक लेखकांनी बऱ्याच इंग्रजी शब्दांची संक्षिप्त रूपं वापरण्यास सुरुवात केली. आता ज्याप्रमाणे आपण LOL, ROFL, DND असे शॉर्टफॉर्म वापरतो, तसंच काहीसं. त्या वेळीच Oll Korrect म्हणून OK चा वापर करण्यात आला होता.

तर एका माहितीनुसार OK चा फुल फॉर्म खरंतर Olla Kolla असा आहे. हा एक ग्रीक शब्द आहे, ज्याचा अर्थ होतो की ‘सगळं ठीक आहे.

‘हफपोस्ट’ने प्रसिद्ध केलेल्या एका रिपोर्टमध्ये मात्र वेगळीच माहिती दिली आहे. या अहवालानुसार, ओके हा शब्द खरंतर Okeh या शब्दापासून (OK word origin claim) आला आहे. अमेरिकेतल्या मूळनिवासी असलेल्या चॉक्टॉ जातीमध्ये हा शब्द वापरला जातो.

यासोबतच OK शब्दामागे आणखीही बराच मजेशीर इतिहास आहे. 1840मध्ये अमेरिकेचे राष्ट्राध्यक्ष मार्टिन बॅन ब्यूरन यांच्या प्रचार यात्रेमध्ये OK शब्दाला निवडणूक घोषणेच्या रूपानं वापरण्यात आलं. वॅन ब्यूरन यांचं टोपणनाव ‘ओल्ड किंडरहुक’ असं होतं. याचा शॉर्टफॉर्म OK होत असल्यामुळे लोक प्रचारासाठी त्याचा वापर करत होते. त्या वेळी देशभरात ‘ओके क्लब’ही सुरू करण्यात आले होते.

सुरुवात कुठूनही झाली असली, तरी सध्या ओके हा शब्द आपल्याला मोठ्या प्रमाणात फायद्याचा ठरत आहे. शिवाय, आता ओकेचा अर्थही सर्वांना माहिती झाला आहे. त्यामुळे ओके हा शब्द खरं तर दुसराच काहीतरी आहे असं कोणी सांगत असेल, तर त्यालाही तुम्ही ओके म्हणू शकता.