महायुतीच्या विजयाचं हेच खरं कारण! मग महाविकास आघाडीचं काय चुकलं? सांगलीचे मतदार म्हणतात..

सांगली: महाराष्ट्र विधानसभा निवडणुकीत महायुतीच्या उमेदवारांनी दणदणीत विजय मिळवला आहे. राजकीय विश्लेषकांचे अंदाज चुकीचे ठरवत राज्यात पूर्ण बहुमताने महायुतीची सत्ता आली आहे. अनेकांनी या निकालाचं वर्णन अनपेक्षित असंच केलं आहे. यावर जनतेतूनही प्रतिक्रिया उमटत असून सांगलीतील मतदारांनी महायुतीचा विजय कसा झाला? आणि महाविकास आघाडीचं नेमकं काय चुकलं? याबाबत लोकल18 सोबत बोलताना आपल्या भावना व्यक्त केल्या आहेत.

"लाडकी बहिण योजनेमुळे, तसेच वीज बिल माफी सारख्या निर्णयामुळे महायुतीचा फायदा झाला. निवडणुकांना पुढे ठेवत महायुतीने घेतलेले निर्णय त्यांच्या फायद्याचे ठरले. तर महाविकास आघाडी आपापसामध्ये मतभेद निर्माण करण्यात गुंतली असल्याने बेसावध राहिली. याचाच फटका त्यांना निवडणुकीमध्ये बसलेला दिसत आहे. जागावाटप, बंडखोरी आणि मताची विभागणी याचा महाविकास आघाडीला फटका बसल्याचे दिसते. याउलट महायुतीमध्ये एकी असल्याचे दिसून आले. एकीच्या बळामुळेच महायुतीला दणदणीत विजय मिळवता आला, असं कुंडल येथील व्ही. वाय. लाड यांनी सांगितले.

दरम्यान, विधानसभा निवडणुकीत भाजप महायुतीनं दणदणीत विजय मिळवला असून महाविकास आघाडीला 50 जागांवर समाधान मानावं लागलंय. तर महायुतीनं 234 जागांवर बाजी मारलीये. यात भाजप 132, शिवसेना 57 आणि राष्ट्रवादी काँग्रेसने 41 जागांवर विजय मिळवला आहे.