अनोख्या तंत्रज्ञानाने पुणे स्टेशन सज्ज, गुन्हेगारांची ओळख एका क्षणात होणार, हे आता कसं शक्य?

दिल्लीतील अलीकडील बॉम्बस्फोटानंतर देशभरातील सुरक्षाव्यवस्थेबाबत प्रश्न निर्माण झाले असताना पुणे स्थानकाची सुरक्षा अधिक बळकट करण्याची गरज होती. अशा परिस्थितीत हे एआय कॅमेरे रेल्वे पोलिसांसाठी रिअल-टाइम मदतनीस ठरणार आहेत. या कॅमेऱ्यांचे सर्वात महत्त्वाचे वैशिष्ट्य म्हणजे त्यांची फेस रेकग्निशन क्षमता. पोलिसांच्या डेटाबेसमधील रेकॉर्डवरील गुन्हेगार अथवा संशयित व्यक्ती स्थानक परिसरात दाखल होताच यंत्रणा सक्रिय होईल आणि नियंत्रण कक्षाला तत्काळ अलर्ट पाठवेल.

अलर्टमध्ये त्या व्यक्तीचे चित्र, ओळख तपशील आणि त्या क्षणी ती कुठे उभी आहे याची अचूक माहिती असेल. त्यामुळे पोलिसांना घटनास्थळी पोहोचून त्वरीत कारवाई करता येणार आहे. गर्दीच्या वेळेत किंवा प्लॅटफॉर्मवर वाढलेल्या हालचालीदरम्यानही एआय कॅमेऱ्यांची अचूकता टिकून राहील, असा दावा रेल्वे विभागाने केला आहे.

फोर-के (4K) क्वालिटी: उच्च स्पष्टतेचे रेकॉर्डिंग

एआय-आधारित विश्लेषण: संशयास्पद हालचाली, गर्दीतील अनियमितता ओळखण्याची क्षमता

फेस रेकग्निशन सिस्टम: गुन्हेगार ओळखून त्वरित अलर्ट

कॅमेरे बसवण्याचे काम पूर्ण झाले असून त्यांना प्रणालीशी जोडण्याचे अंतिम टप्प्याचे कार्य सुरू आहे. विभागीय रेल्वे व्यवस्थापक (डीआरएम), मध्य रेल्वे, पुणे विभाग यांनी सांगितले की, चालू महिनाअखेरपर्यंत ही सुविधा सुरू करण्यात येईल. यामुळे प्रवाशांची सुरक्षा दुपटीने वाढेल, असा आम्हाला विश्वास आहे.

पुणे रेल्वे स्थानकातून दररोज हजारो प्रवासी प्रवास करतात. इतक्या मोठ्या वाहतुकीत गुन्हेगारांना शोधणे किंवा अनियमित हालचालींची तपासणी करणे कठीण असते. या नवीन प्रणालीमुळे केवळ गुन्हे रोखले जाणार नाहीत, तर आपत्कालीन परिस्थितीत पोलिसांना अधिक तत्परतेने प्रतिसाद देता येईल.या तांत्रिक बदलामुळे पुणे स्थानक देशातील सर्वात सुरक्षित रेल्वे टर्मिनल्सपैकी एक बनण्याच्या दिशेने पुढे जात आहे.