पुणेकरांनो सावधान! औंध पाठोपाठ आता धानोरीत पहाटेच दिसला बिबट्या; नागरिकांची झोपच उडाली

बिबट्या पहाटेच्या वेळी धानोरीच्या निवासी भागात फिरत असल्याचं फुटेज सीसीटीव्ही कॅमेऱ्यात स्पष्टपणे कैद झालं आहे. हे फुटेज समाज माध्यमांवर मोठ्या प्रमाणावर व्हायरल झालं असून, त्यामुळे परिसरात दहशत निर्माण झाली आहे. बिबट्या दिसल्याची पुष्टी वनविभागाने केली असून, त्यांनी परिसरातील अनेक सीसीटीव्ही फुटेज तपासले आहेत.

पुणे शहरातील औंध भागातही नुकतंच बिबट्याचं दर्शन झालं होतं. एका सोसायटीच्या आसपास बिबट्याचा मुक्त संचार सुरू असल्याचा व्हिडीओ सीसीटीव्हीमध्ये कैद झाला. पुणे शहरातील औंध भागात बिबट्याची एन्ट्री झाल्याची माहिती लगेचच सगळीकडे पसरली. शहराच्या मध्यवर्ती भागात स्थानिकांना बिबट्या आढळून आल्याने पुणेकरांमध्ये दहशतीचे वातावरण निर्माण झालं आहे. अशातच आता धानोरीमधूनही बिबट्याची बातमी समोर आल्याने टेन्शन वाढलं आहे. वन विभागाकडून आणि रेस्क्यू टीमकडून बिबट्याच्या शोध सुरू आहे.