दिलीप मोहिते पाटलांना पुन्हा निवडून द्या, त्यांना मंत्री करतो, अजितदादांची जाहीर सभेत घोषणा

अजित पवार म्हणाले, विधानसभा निवडणुकीच्या अनुषंगाने महायुतीत जागा वाटपाच्या चर्चांना सुरूवात झाली आहे. अजून कोणती जागा कुणाला जाणार, याचे सूत्र ठरलेले नाही. विद्यमान कार्यक्रमाट आमदारांना पुन्हा संधी द्यावी, याकडे कल आहे. त्यानुसार विद्यमान आमदार दिलीप मोहिते पाटील यांना पुन्हा संधी द्यावी, अशी जनतेची इच्छा असल्याचे अजित पवार म्हणाले. तसेच मी आज उमेदवार जाहीर करणार नाही, नाहीतर आमच्या महायुतीतील लोक म्हणायचे, हा बाबा तर जागाच जाहीर करायला लागलाय, अशी फटकेबाजीही त्यांनी केली.

दिलीप मोहिते पाटील यांना मी विधानसभेला पुनश्च संधी दिल्यावर त्यांना बहुमतांनी निवडून द्या. त्यांना मतरूपी आशीर्वाद द्या. आमदारकीच्या पुढे त्यांची गाडी गेलेली नाही. त्यांची गाडी लाल दिव्यापर्यंत पोहोचावी, अशी येथील जनतेची इच्छा आहे. ती इच्छा पूर्ण करण्याचा मी प्रयत्न करेन, अशी थेट घोषणाच अजित पवार यांनी केली.

राष्ट्रवादीतील फुटीनंतर अजित पवार समर्थक आमदारांच्या जिल्ह्यात जाऊन राष्ट्रवादीला आशीर्वाद देण्याचे आवाहन करत आहेत. आजही त्यांनी घड्याळावर लक्ष ठेवा, अशी विनंती केली. ते म्हणाले, "चाकणकरांनो आणि खेडकरांनो मला साथ द्या. तुमच्या बहुमोल साथीची मला गरज आहे. अर्थमंत्री म्हणून मी तुमच्या तालुक्याला निधी देऊ शकलो, याचा मनापासून आनंद आहे. मोहिते पाटलांच्या रुपाने तालुक्याला ४५०० हजार कोटींचा निधी देऊन तालुक्याचा चेहरामोहरा पालटण्याचे काम झाले आहे".