Pune News: बिबट्यानंतर पुणेकरांवर आता आणखी एक नवं संकट; घराबाहेर पडताना सावधान!

पुणे : बिबट्यामुळे आधीच दहशतीत असणाऱ्या पुणेकरांसाठी आता आणखी एक चिंता वाढवणारी बातमी समोर आली आहे. आता घराबाहेर पडताना पुणेकरांनी विशेष काळजी घेणं गरजेचं आहे. ते दोन गोष्टींमुळे. पहिलं म्हणजे बिबट्या आणि आता त्यापाठोपाठ दुसरं म्हणजे साप. होय, थंडी ते उन्हाळा सुरू होईपर्यंत त्याच्या मिलनाचा काळ असतो. त्यामुळे आता यापासूनही नागरिकांना स्वतःचा बचाव करावा लागणार आहे. शहरातील औंध, पाषाण, बाणेर, बालेवाडी, म्हाळुंगे आणि सूस या उच्चभ्रू परिसरात रविवारी एकाच दिवसात तब्बल 16 साप पकडण्यात आल्याने नागरिकांमध्ये खळबळ उडाली आहे. सर्पमित्र अनिल कानसकर आणि संग्राम निकम यांनी हे सर्व साप पकडून त्यांना सुरक्षितपणे नैसर्गिक अधिवासात सोडले.