बनेश्वर मंदिर परिसरात धक्कादायक घटना; मधमाशांचे पोळे काढायला मध्यरात्री झाडावर चढलेल्या तरुणाचा गेला जीव, काय घडलं?

बनेश्वर मंदिर परिसरातील वनविभागाच्या हद्दीतील झाडांवर मधमाशांच्या हल्ल्यांचे प्रमाण वाढले होते. यासाठी बुधवारी मध्यरात्री दीडच्या सुमारास हे पोळे काढण्याचे काम सुरू असताना विष्णू पवार झाडावरून खाली कोसळला. त्याला तातडीने ससून रुग्णालयात दाखल करण्यात आलं. मात्र उपचारादरम्यान त्याचा मृत्यू झाला.

सत्यशोधक बहुजन आघाडीचे सचिव गणपत काटेकर यांनी घटनास्थळी भेट देऊन गंभीर आरोप केले आहेत. पोळे काढण्यासाठी अग्निशमन दल किंवा तज्ज्ञांची मदत घेण्याऐवजी, आदिवासी समाजातील तरुणांना कोणत्याही सुरक्षिततेशिवाय कामाला लावल्याचे समोर येत आहे. वनविभागाने "आमच्याकडे तज्ज्ञ नाहीत" असे सांगून हात वर केले. तर ट्रस्टने घाईघाईने हे पाऊल उचलल्याचे बोलले जात आहे.