पुणेकरांनो, त्या टोळीपासून सावधान! कार अडवून 4 जण समोर येतात अन् मग..; 'तो' भयंकर खेळ कॅमेऱ्यात कैद

मिळालेल्या माहितीनुसार, ही टोळी प्रामुख्याने आलिशान आणि महागड्या कारला आपले लक्ष्य बनवते. टोळीतील तरुण दुचाकीवरून येतात आणि मुद्दाम कारला हलकासा कट मारतात किंवा गाडी घासून नेतात. गाडी थांबताच, "माझ्या गाडीचे मोठे नुकसान झाले आहे, माझा पाय मोडला आहे," असा आरडाओरडा सुरू केला जातो. काही वेळातच टोळीतील इतर साथीदार तिथे जमा होतात आणि कारचालकाला घेरून त्याच्यावर मानसिक दडपण आणतात. प्रकरण पोलीस ठाण्यापर्यंत न नेण्यासाठी आणि वाद मिटवण्यासाठी काही हजार रुपयांची मागणी केली जाते.

नुकत्याच समोर आलेल्या एका घटनेत, एका कारचालकाने ही फसवणूक वेळीच ओळखली. जेव्हा दुचाकीस्वाराने गोंधळ घालण्यास सुरुवात केली, तेव्हा चालकाने आपल्या कारमध्ये डॅश कॅम असल्याचे सांगितले. कॅमेरा असल्याचे कळताच, खंडणी उकळणाऱ्या भामट्यांनी तिथून काढता पाय घेतला. डॅश कॅममधील फुटेजमध्ये स्पष्ट दिसत आहे की, दुचाकीस्वाराने स्वतःहून कारला कट मारला होता.