दाम्पत्याला मिळालं कष्टाचं फळ, आज 8 देशांमध्ये पोहोचतायेत उत्पादनं, फडतरे कुटुंबाच्या जिद्दीची गोष्ट!

पुणे : व्यवसाय करणे हे अनेकांचे स्वप्न असते, यासाठी अनेक जण आपली नोकरी सोडून व्यवसाय करतात आणि मेहनतीने त्यात यशही मिळवतात. याचे उत्तम उदाहरण म्हणजे पुण्यातील इंदापूर तालुक्यातील तात्यासाहेब फडतरे व त्यांच्या पत्नी या आहेत. दोघांनी मिळून 2012 मध्ये मिलेट्सच्या व्यवसायाला सुरुवात केली. यामध्ये ज्वारी, बाजरी आणि नाचणीपासून बनवलेली इडली, चकली, शंकरपाळी, रवा, विविध पीठे आणि चिवडा, 30 हून अधिक पदार्थ बनवतात. त्यांनी फक्त 900 रुपयांपासून त्यांनी आपल्या व्यवसायाची सुरुवात केली. आज ते या व्यवसायाच्या माध्यमातून महिन्याला 15 ते 20 लाख रुपये नफा मिळवत आहेत. त्यांचे हे मिलेट्स जवळजवळ 8 देशामध्ये निर्यात केली जाते. आज जाणून घेऊयात, त्यांच्या व्यवसायाची यशस्वी कहाणी.

तात्यासाहेब आणि सरोजिनी फडतरे या दाम्पत्याने सुमारे 14 वर्षांपूर्वी भरडधान्यांवर आधारित प्रक्रिया उद्योग सुरू केला आणि इवल्याशा रोपट्याचे आज वटवृक्षात रूपांतर झाले आहे. ते तब्बल 8 देशांमध्ये 30 हून अधिक उत्पादने निर्यात करत आहेत. तर अडीच कोटीपर्यंत वार्षिक उलाढाल करतात. त्यामुळेच त्यांचा हा अचंबित करणारा सगळा प्रवास आहे. फडतरे यांनी पत्रकारिता क्षेत्रामध्ये जवळपास 12 वर्ष नोकरी केली. यानंतर नोकरीचा राजीनामा देऊन मिलेट्सचा आपला व्यवसाय सुरू केला.

बहुतांश वेळा कच्चा मालाची खरेदी ही राज्यातील विविध भागांतील शेतकऱ्यांकडून होते. प्रकल्प सुरू केला, त्यावेळी महिन्याला 3 क्विंटल धान्य लागत होते. मात्र, आता दर महिन्याला 10 टनपेक्षा अधिक धान्याची गरज भासते. त्यासाठी राज्यभरातील 10 शेतकरी उत्पादक कंपन्या व 300 पेक्षा अधिक शेतकऱ्यांसोबत नेटवर्क तयार केले आहे, अशी माहिती gud2eat कंपनीचे मालक तात्यासाहेब फडतरे यांनी दिली.