हडपसर रेल्वे स्थानकाचा कायापालट! चौथ्या फलाटाला रेल्वे बोर्डाची मंजुरी, प्रवाशांना होणार 'हा' मोठा फायदा

सध्या हडपसर स्थानकावर तीन फलाट असून, येथून दररोज सुमारे चार हजार प्रवासी प्रवास करतात. नवीन फलाटामुळे हडपसर, मांजरी, वाघोली, खराडी आणि मगरपट्टा सिटी परिसरातील प्रवाशांना लांब पल्ल्याच्या गाड्यांसाठी मुख्य पुणे स्थानकावर जाण्याची गरज पडणार नाही. आयटी कंपन्यांत काम करणाऱ्या नोकरदार वर्गासाठी हे टर्मिनल अत्यंत सोयीचे ठरणार आहे. एक फलाट वाढल्यामुळे दिवसभरात किमान ३ ते ४ नवीन गाड्यांची सोय होणे शक्य होणार आहे.

सध्या ४०० मीटर लांबीच्या (१४ डब्यांच्या गाड्यांसाठी) फलाटास मंजुरी मिळाली असली तरी, रेल्वे प्रशासन २४ डब्यांच्या गाड्यांसाठी ६५० मीटर लांबीच्या फलाटासाठी आग्रही आहे. या प्रकल्पासाठी सुमारे ७ कोटी रुपये खर्च अपेक्षित आहे. तांत्रिक प्रक्रिया पूर्ण होताच निविदा काढल्या जातील.