नगरपरिषद निवडणूक मतदानाच्या आधी जिल्हाधिकाऱ्यांकडून महत्वपूर्ण आदेश लागू, असे आहेत नियम

पुणे: पुणे जिल्ह्यातील नगरपरिषद आणि नगरपंचायत सार्वत्रिक निवडणुका येत्या काही दिवसांत पार पडणार आहेत. विविध पक्षांच्या उमेदवारांकडून प्रचाराला जोरदार वेग आला आहे. निवडणुकांच्या दरम्यान शांतता आणि सुरक्षितता राखण्यासाठी जिल्हा दंडाधिकारी जितेंद्र डुडी यांनी महत्त्वाचे आदेश जारी केले आहेत. या आदेशानुसार मतदान केंद्रे आणि मतमोजणी स्थळांपासून 100 मीटर परिसर ‘प्रतिबंधित क्षेत्र’ म्हणून घोषित करण्यात आले आहे.

या बंदिस्त क्षेत्रात मतदारांशिवाय इतर कोणालाही प्रवेश दिला जाणार नाही. 2 डिसेंबरला मतदान सकाळी 7.30 वाजता सुरू झाल्यापासून मतदान संपेपर्यंत हे नियम लागू असतील. 3 डिसेंबरला मतमोजणीसाठी सकाळी 6 वाजल्यापासून मतमोजणी पूर्ण होईपर्यंत प्रवेश आणि इतर हालचालींवर निर्बंध राहतील. या परिसरात दुकाने उघडणे, फेरीविक्री करणे किंवा तात्पुरती मंडपे लावणे यावर बंदी असेल. मोबाईल फोन, कॉर्डलेस, वायरलेस सेट, ध्वनिक्षेपक आणि इतर इलेक्ट्रॉनिक उपकरणांचा वापर करण्यास देखील मनाई करण्यात आली आहे.

निवडणूक कामाशी संबंधित अधिकारी, कर्मचारी आणि त्यांची वाहने यांना मात्र या बंदीपासून सूट देण्यात आली आहे. आदेशाचे उल्लंघन केल्यास लोकप्रतिनिधित्व अधिनियम आणि भारतीय न्याय संहिता 2023 च्या कलम 223 नुसार कारवाई करण्यात येईल, असेही आदेशात नमूद करण्यात आले आहे