Ganeshotsav 2024 : लाडक्या बाप्पाच्या आगमनाचे वेध, जाणून घ्या, पूजेचा शुभ मुहूर्त आणि महत्त्व, VIDEO

पुणे : लाडक्या गणरायाच्या आगमनाची सर्वजण आतुरतेने वाट पाहत आहेत. भाद्रपद शुद्ध चतुर्थीला गणपती बाप्पाच्या मूर्तिची पूजा करण्याची प्राचीन परंपरा आपल्याकडे आहे. देशभरासह अन्य देशातही मोठ्या प्रमाणात गणेश उत्सव साजरा केला जातो. गणपती बाप्पाच्या आगमनाची यंदाची तारीख, महत्व आणि पूजेचा शुभ मुहूर्त याविषयीची माहिती जाणून घेऊयात.

पुण्यातील प्रसिद्ध ज्योतिष वेदमूर्ती कुलदीप जोशी यांनी याबाबत महत्त्वाची माहिती दिली. लोकल18 शी बोलताना त्यांनी सांगितले की, 7 सप्टेंबर रोजी लाडक्या गणरायाचे आगमन होत आहे. या दिवशी सर्वार्थ सिद्धी योग, बुधआदित्य योग, शषराज योग आणि नवपंचम योग हे 4 योग त्यादिवशी असल्याने संपूर्ण दिवसच आपल्यासाठी शुभ आहे. मात्र, घरगुती गणपतीची प्राणप्रतिष्ठा ही दुपारी 2 वाजून 12 मिनिटांनी करून घ्यायची आहे. पहाटे 4 वाजून 50 मिनिटांपासून दुपारी 2 वाजून 12 मिनिटाचा कालावधी हा गणेश प्राणप्रतिष्ठेसाठी अत्यंत उत्तम आहे, अशी माहिती ज्योतिष वेदमूर्ती कुलदीप जोशी यांनी सांगितले.