मुंबईला उगीच बदनाम केलंय! वाहतूक कोंडीत 18 व्या स्थानावर, तर पुणे कितव्या क्रमांकावर?

पुण्याची ही रँकिंग पाहताना एक गोष्ट लक्षात येते की, गेल्या वर्षीच्या तुलनेत पुण्याच्या स्थितीत अंशतः सुधारणा झाली आहे. गेल्या वर्षी पुणे जगात चौथ्या स्थानी होतं, ते आता पाचव्या क्रमांकावर आलं आहे. ही सुधारणा कागदावर दिसत असली तरी, प्रत्यक्ष रस्त्यावर उतरल्यावर पुणेकरांना होणारा त्रास काही कमी झालेला नाही. शहराच्या एका टोकाकडून दुसऱ्या टोकाकडे जाताना आजही नागरिकांना तासनतास सिग्नलवर उभं राहावं लागत आहे.

या अहवालातील सर्वात लक्षवेधी बाब म्हणजे प्रवासाचा वेग. पुण्यात सरासरी ४.५ किलोमीटरचं अंतर पार करण्यासाठी तब्बल १५ मिनिटांचा वेळ खर्च करावा लागतो. याचाच अर्थ, जर तुम्हाला १० ते १२ किलोमीटरचा प्रवास करायचा असेल, तर तुमचे आयुष्यातील किमान ४० ते ५० मिनिटं फक्त ट्रॅफिकमध्येच जाणार आहेत. ऑफिसला जाणाऱ्या कर्मचाऱ्यांपासून ते विद्यार्थ्यांपर्यंत सर्वांनाच या संथ वेगाचा फटका बसत आहे.

दुसरीकडे, भारताची आर्थिक राजधानी असलेल्या मुंबईने पुण्यापेक्षा चांगली कामगिरी केली आहे. मुंबई वाहतूक कोंडीच्या जागतिक क्रमवारीत १८ व्या स्थानावर आहे. मात्र, भारतातील आयटी हब मानल्या जाणाऱ्या बंगळुरूची अवस्था पुण्यापेक्षाही भयानक आहे. बंगळुरू शहर जगात दुसऱ्या क्रमांकावर असून तिथे ट्रॅफिकची समस्या अतिशय गंभीर बनली आहे. तर मेक्सिको सिटीने ट्रॅफिकच्या बाबतीत जगात पहिला क्रमांक पटकावला आहे.