पिंपरी चिंचवडकरांसाठी धोक्याची घंटा, हवा झाली दूषित, धक्कादायक माहिती समोर आल्याने नागरिकांच्या आरोग्याचा प्रश्न ऐरणीवर

पुणे : पिंपरी-चिंचवड शहर हे औद्योगिक नागरी म्हणून उदयास आलेले शहर आहे. मात्र, आता या शहरातील हवा गेल्या अनेक करणामुळे अतिवाईट श्रेणीमध्ये गेली आहे. शहराची झपाट्याने वाढ होत आहे. अनेक वेगवेगळी बांधकामे तसेच वाहनांचा धूर, फटाके, एमआयडीसी कंपनीतील धूर या सर्व कारणांमुळे पिंपरी चिंचवडची हवा दूषित झाली आहे.

शहरातील भोसरी, वाकडमधील भूमकर चौक, निगडी या भागातील हवेची गुणवत्ता खराब श्रेणीत नोंदवली गेली आहे. वर्षभरात 3 महिने शहरातील हवा वाईट श्रेणीत गेली आहे. तर 9 महिने समाधानकारक असल्याचे महापालिकेने केलेल्या पर्यावरण सस्थिती अहवालात म्हटले आहे. भारतीय हवामानशास्त्र (आयआयटीएम) संकेतस्थळाच्या उष्णकटिबंधीय संस्थेच्या 'सफर' माध्यमातून प्रदूषणाच्या नोंदी घेतल्या आहेत.

हवा दूषित झाल्याने पालिकेने उपाययोजना हाती घेतल्या होत्या. नोव्हेंबरमध्ये शहरातील सर्व बांधकामे 8 दिवस बंद ठेवली होती. वायू प्रदूषण रोखण्यासाठी महापालिकेच्या वतीने 32 प्रभागांमध्ये 16 वायू प्रदूषण नियंत्रण पथकांची नेमणूक करण्यात आली होती. यादरम्यान प्रदूषण नियंत्रण तरतुदीचे पालन न केल्याचे उघड झाल्याने दंड आकारला होता.