'मी गेलो तरी कंपनी बंद ठेवू नका, देशाचं नुकसान नको', कर्मचाऱ्यांनी सांगितली रतन टाटांची आठवण

हजारो कर्मचारी काम करत असलेल्या या टाटा मोटर्सच्या प्लांटमध्ये टाटांचे निधन झाल्यानंतरही काम बंद ठेवण्यात आलेलं नाही. मी गेल्यानंतरही कंपनी सुरू ठेवा. देशाचं, कामगारांचं नुकसान व्हायला नको असं स्वत: टाटांनी सांगितलं होतं असं कामगारांनी सांगितलंय. टाटा प्लांटमधील कर्मचाऱ्यांनी रतन टाटांसोबतच्या आठवणी जाग्या केल्या.

रतन टाटा यांच्या निधनानंतर त्यांचा वारस कोण होणार, त्यांची जागा कोण घेणार, या चर्चांना उधाण आले आहे. टाटा समूहाच्या उद्योग साम्राज्याची धुरा कोणाच्या हाती जाणार, याचीही चर्चा रंगली आहे. टाटा समूहाची धुरा कोणाच्या हाती असणार, याचे नियोजन आधीच करण्यात आले आहे. एन. चंद्रशेखर यांनी २०१७ मध्ये होल्डिंग कंपनी टाटा सन्सच्या अध्यक्षपदाची धुरा हाती घेतली. टाटा कुटुंबातील इतर सदस्य देखील टाटा समूहातील इतर उद्योगांचे नेतृत्व करत आहेत.

रतन टाटा यांचे सावत्र भाऊ नोएल टाटा यांचे नाव सध्या आघाडीवर आहे. नोएल टाटा हे नवल टाटा यांच्या दुसऱ्या पत्नी सिमोन यांचे पुत्र आहेत. कुटु्ंबातील सदस्य म्हणून त्यांचे नाव आघाडीवर आहे. मात्र, नोएल टाटा यांच्या वयामुळे कदाचित त्यांच्या तीन मुलांपैकी एकावर टाटा समूहाची जबाबदारी दिली जाऊ शकते.