Pune Video: पुण्यात पीएमपीएल बसचालकाची मुजोरी, चष्मा फुटेपर्यंत मारहाण; व्हिडीओ व्हायरल

समोर आलेल्या माहितीनुसार, हा प्रकार भेकराईनगर ते भोसरी या मार्गावरील बसमध्ये घडला. संबंधित व्यक्ती आणि बसचालक यांच्यात किरकोळ कारणावरून वाद झाला. व्हिडिओमध्ये दिसतं की बस चालकाने प्रथम त्या व्यक्तीशी उर्मट भाषेत वाद घातला. त्यानंतर संतापाच्या भरात चालक थेट बसमधून खाली उतरला आणि त्या व्यक्तीच्या कानशिलात जोरदार लगावली. अचानक झालेल्या हल्ल्यामुळे त्या व्यक्तीचा चष्मा तुटला.

घटनेनंतर सुद्धा बसचालकाने संताप शांत न करता त्याच्यावर पुन्हा पुन्हा हात उगारला. या सर्व प्रकारादरम्यान परिसरातील काही नागरिकांनी मोबाईलवर व्हिडीओ शूट केला, जो आता सोशल मीडियावर मोठ्या प्रमाणात व्हायरल होत आहे. व्हिडिओ पाहून नागरिकांनी संताप व्यक्त केला असून, अशा प्रकारच्या बसचालकांवर कठोर कारवाईची मागणी केली जात आहे.

दरम्यान, पीएमपीएल प्रशासनाने या घटनेची दखल घेतल्याचे समजते. शहरात यापूर्वीही पीएमपीएल बसचालकांच्या उद्धट वर्तनाचे प्रकार समोर आले आहेत. मात्र वारंवार तक्रारी असूनही ठोस पावले उचलली जात नसल्याचा नागरिकांचा आरोप आहे. प्रवाशांच्या सुरक्षेचा प्रश्न पुन्हा एकदा चर्चेत आला असून, प्रशासनाने तत्काळ पावले उचलावीत, अशी मागणी वाढत आहे.

या घटनेचा व्हिडिओ काढून समाज माध्यमावर व्हायरल झाला आहे.मारहाण करणारा व्हिडिओ समाज माध्यमावर व्हायरल झाल्याने या घटनेतील मुजोर चालकाच्या माज बाबत दिवसभर समाज मध्यामावर तीव्र संताप व्यक्त करण्यात येत आहे.