Pune News: 15 व्या मजल्यावर सुरू होतं बांधकाम, कामगाराचा अचानक तोल गेला अन्..., पुण्यातील भयंकर घटना

चैतू बोसाक (रा. दांडेकर पूल, पर्वती, मूळ रा. बिहार) असे दुर्घटनेत जखमी झालेल्या मजुराचे नाव आहे. दांडेकर पूल परिसरातील आंबिल ओढा येथे सध्या एसआरएच्या इमारतींचे काम युद्धपातळीवर सुरू आहे. सोमवारी (२२ डिसेंबर) दुपारी अडीचच्या सुमारास चैतू पंधराव्या मजल्यावर कामात व्यस्त असताना अचानक त्याचा तोल गेला आणि तो खाली पडला.

या प्रकरणी चैतूचा भाऊ पवन राजेंद्र बोसाक (२४) याने पर्वती पोलीस ठाण्यात तक्रार दिली आहे. पवनने दिलेल्या फिर्यादीनुसार, ठेकेदार राज धर्मेंद्र दास (२४, रा. दांडेकर पूल, मूळ रा. बिहार) याने उंचीवर काम करणाऱ्या मजुरांसाठी सेफ्टी बेल्ट, जाळी किंवा हेल्मेट यांसारख्या सुरक्षा साधनांची कोणतीही तरतूद केली नव्हती. या गंभीर निष्काळजीपणामुळेच चैतूचा जीव धोक्यात आल्याचे तक्रारीत म्हटले आहे. पोलिसांनी ठेकेदाराविरुद्ध गुन्हा दाखल केला आहे.