Navi Mumbai Airport: अखेर प्रतिक्षा संपली! नवी मुंबईतून पहिलं टेकऑफ, ‘या’ 5 शहरांसाठी विमानसेवा सुरू

पहिल्याच दिवशी सुमारे चार हजार प्रवासी या विमानतळावरून प्रवास करतील. नवी मुंबई आंतरराष्ट्रीय विमानतळ हे देशातील ग्रीनफिल्ड विमानतळ आहे. या विमानतळावरील पहिला प्रवास सर्व प्रवाशांच्या लक्षात राहावा, त्यामुळे प्रवाशांच्या स्वागतासाठी विमानतळ व्यवस्थापकांकडून विविध पाच ठिकाणी सांस्कृतिक कार्यक्रमाचे आयोजन करण्यात आले आहे. त्यामुळे प्रशासनाच्या वतीने विशेष योजना आखण्यात आल्या आहेत.

प्रवासादरम्यान विमानतळावर आणि विमानातही प्रवाशांना भेटवस्तू, बक्षिसे दिली जाणार आहेत. आज नवी मुंबई ते गोवा, कोची, बेंगळुरू आणि हैदराबाद अशी विमानसेवा असणार असून, विमानतळ व्यवस्थापनाबरोबरच काही विमान कंपन्यांकडूनही प्रवाशांच्या स्वागतासाठी विशेष योजना आखण्यात आली आहे. त्यामुळे हा प्रवास प्रवाशांसाठी सुखद धक्का देणारा ठरेल, असा विश्वास अदानी विमानतळ समूहाचे संचालक जीत अदानी यांनी व्यक्त केला.

दरम्यान, नवी मुंबईतून विमानतळाकडे जाणाऱ्या सर्व रस्त्यांची डागडुजी, साफसफाई करण्यात आली आहे. विमानतळ परिसरातही चोख सुरक्षा व्यवस्था ठेवण्यात आल्याचे चित्र दिसत आहे. कमळाच्या आकाराचे हे आकर्षक विमानतळ असून, विमानतळाच्या आतील रचनाही अत्याधुनिक पद्धतीने करण्यात आली आहे. इथे महाराष्ट्राची सांस्कृतिक प्रतिमाही पाहायला मिळणार आहे, असे व्यवस्थापकांनी सांगितले.

2. नवी मुंबई विमानतळावरून प्रवाशांसाठी बंगळूरु, हैदराबाद, गोवा, कोची आणि अहमदाबादसाठी उड्डाणे सुरू होतील. आकाशा एअर, इंडिगो एअरलाईन्स, एअर इंडिया एक्सप्रेस आणि स्टार एअर या कंपन्या सेवा देणार आहेत.