दुकानात बसलेला तरुण अचानक धावत सुटला अन्..., मोरगावमध्ये पोलीस चौकीसमोरच हादरवणारी घटना

मिळालेल्या माहितीनुसार, सुपा पोलीस ठाण्यांतर्गत येणाऱ्या मोरगाव पोलीस मदत केंद्राजवळ बुधवारी सकाळी ७ ते ८ वाजेच्या सुमारास हा प्रकार घडला. येथील एका दुकानात बसलेला तरुण अचानक उठून रस्त्याच्या दिशेने धावला. समोरून येणारा भरधाव टेम्पो पाहून त्याने कसलाही विचार न करता थेट गाडीच्या चाकाखाली उडी घेतली. टेम्पोचे चाक अंगावरून गेल्याने तरुणाचा जागीच करुण अंत झाला.

घटनेची माहिती मिळताच पोलिसांनी तातडीने धाव घेतली. मृत तरुण हा स्थानिक नसून परजिल्ह्यातील असावा, असा प्राथमिक अंदाज पोलिसांनी वर्तवला आहे. मात्र, त्याचे नाव आणि त्याने हे टोकाचे पाऊल का उचलले, याचे कारण अद्याप समजू शकलेले नाही. पोलिसांनी मृतदेह ताब्यात घेतला असून ओळखीसाठी प्रयत्न सुरू केले आहेत.

ही सर्व घटना सीसीटीव्हीमध्ये रेकॉर्ड झाली असून, पोलिसांनी ते फुटेज ताब्यात घेतले आहे. सुपा पोलीस ठाण्याचे सहाय्यक पोलीस निरीक्षक मनोज कुमार नवसरे यांनी दिलेल्या माहितीनुसार, याप्रकरणी सध्या 'आकस्मिक मृत्यू'ची नोंद करण्यात आली आहे. भरचौकात आणि पोलीस मदत केंद्राच्या अगदी समोरच घडलेल्या या घटनेमुळे मोरगाव परिसरात मोठी खळबळ उडाली आहे.