पुणे हादरलं! बारावीचा पेपर देऊन बाहेर येताच विद्यार्थ्यावर कोयत्यानं सपासप वार; अल्पवयीन मुलांचं कांड

जखमी झालेला १८ वर्षीय विद्यार्थी मंगळवारी दुपारी बारावीचा पेपर देऊन महाविद्यालयाबाहेर पडला होता. तो घरी जाण्याच्या तयारीत असतानाच, दबा धरून बसलेल्या तीन अल्पवयीन मुलांनी त्याला गाठलं. काही समजण्याच्या आतच त्यांनी शिवीगाळ करत धारदार कोयत्याने विद्यार्थ्यावर वार केले. या हल्ल्यात विद्यार्थी किरकोळ जखमी झाला असून, त्याला तातडीने उपचार देण्यात आले आहेत.

पोलीस तपासात समोर आले की, जखमी विद्यार्थी आणि हल्लेखोर मुले हे पूर्वी वारजे भागातील एकाच शाळेत शिक्षण घेत होते. दहावीत असताना त्यांच्यात काही कारणावरून वाद झाला होता. त्याच वादाचा राग मनात धरून, आरोपींनी तो बारावीची परीक्षा कोणत्या केंद्रावर देतोय याची माहिती काढली आणि त्याला गाठून हा हल्ला केला.

घटनेची माहिती मिळताच परिमंडळ तीनचे पोलीस उपायुक्त संभाजी कदम आणि कोथरूड पोलीस ठाण्याचे वरिष्ठ पोलीस निरीक्षक संदीप देशमाने यांनी पथकासह घटनास्थळी धाव घेतली. पोलिसांनी वेगाने हालचाली करत तिन्ही अल्पवयीन मुलांना ताब्यात घेतले असून, त्यांच्याकडून हल्ल्यासाठी वापरलेला कोयता जप्त केला आहे.