Pune Traffic: दहीहंडी उत्सवामुळे पुण्यातील वाहतुकीत मोठे बदल, हे रस्ते बंद राहणार, पर्यायी मार्ग

16 ऑगस्ट रोजी सकाळी 8 वाजल्यापासून मध्यरात्रीपर्यंत आवश्यकतेनुसार वाहतुकीत बदल केला जाईल. तीन तोफा चौक ते ब्ल्यू नाईल चौक इस्कॉन मंदिरासमोर जाणारा मार्ग बंद राहील. या मार्गासाठी ब्ल्यू नाईल चौक ते तीन तोफा चौक हा मार्ग दुतर्फा खुला करण्यात आला आहे.

कोंढवा वाहतूक विभागात 15 ऑगस्ट रोजी सकाळी 9 पासून ते 16 ऑगस्ट मध्यरात्रीपर्यंत गगन उन्नती चौक व केसर लॉजजवळील यू-टर्न बंद राहतील. खडीमशिन पोलिस चौकी ते श्रीराम चौक या रस्त्यावरची वाहतूक थांबवण्यात येईल. पर्यायी मार्गासाठी खडीमशिन चौकातून यू-टर्न घेऊन इस्कॉन मंदिराच्या पार्किंगकडे वळावे, अशी सूचना पोलिसांनी दिली आहे. तसेच मंतरवाडी फाटा ते कात्रज चौक दरम्यान जड वाहतूकही आवश्यकतेनुसार बंद केली जाईल.

16 ऑगस्ट रोजी संध्याकाळी 4 वाजल्यापासून गर्दी संपेपर्यंत शिवरकर रोड वाहतुकीसाठी बंद करण्यात आला आहे. पर्यायी मार्गासाठी वाहनांनी संविधान चौकातून डावीकडे वळून सनग्रेस स्कूल मार्गे साळुंखे विहार रोडने प्रवास करावा. तसेच संविधान चौकाकडून उजवीकडे जाणारी वाहने फ्लॉवर व्हॅली लेनकडून केदारी पेट्रोलपंपाकडे जातील. साळुंखे विहार रोडवरून येणारी वाहने उजवीकडे वळून त्याच मार्गाने पुढे जातील. दारुवाला पूल, देवजीबाबा चौक आणि फडके हौद चौक येथील वाहतूक पूर्णपणे बंद असेल.

16 ऑगस्ट रोजी संध्याकाळी 4 वाजल्यापासून गर्दी संपेपर्यंत अनेक महत्त्वाच्या मार्गांवर बदल करण्यात येणार आहेत. शिवाजी रोडवरून स्वारगेटला जाणारी वाहतूक स. गो. बर्वे चौकातून जंगली महाराज रोडमार्गे टिळक रोड किंवा शास्त्री रोडवर वळवण्यात येईल. पुरम चौकातून शिवाजीनगरकडे जाणारी वाहतूक टिळक रोडमार्गे अलका टॉकीज चौक आणि एफ.सी. रोडवरून जाईल. तसेच बुधवार चौकातून आप्पा बळवंत चौकाकडे एकेरी वाहतूक असेल, परंतु उलट दिशेने जाणारा मार्ग बंद राहील. सोन्या मारुती चौक ते सेवासदन चौक मार्ग बंद असेल, त्याऐवजी उजवीकडे फडके हौद चौकाकडे वळावे लागेल.