Aviator गेमला पुण्याचा तरुण भुलला; धोनी, कोहलीचा व्हिडीओ पाहून कष्टाचा पैसा गमावला

पुणे : सायबर फसवणुकीचा आणखी एक धक्कादायक प्रकार उघडकीस आला आहे. कोथरूड येथील 30 वर्षीय प्रतीक घुगे या तरुणाने 'एव्हिएटर' नावाच्या ऑनलाइन गेमच्या नादात तब्बल 39 लाख 77 हजार रुपये गमावले आहेत. विशेष म्हणजे, क्रिकेटपटू महेंद्रसिंग धोनी, विराट कोहली आणि उद्योगपती अनंत अंबानी यांच्यासारख्या सेलिब्रिटींचे डीपफेक व्हिडीओ दाखवून तरुणाला या गेममध्ये गुंतविण्यात आले होते.

प्रकरणाची दखल घेत सायबर पोलिसांनी भारतीय न्याय संहितेच्या कलम 318 (4), 319 (2) आणि माहिती तंत्रज्ञान कायद्यानुसार गुन्हा दाखल केला असून पोलिस उपायुक्त संभाजी कदम यांच्या मार्गदर्शनाखाली तपास सुरू आहे. पुण्यात एव्हिएटर गेमशी संबंधित ही पहिलीच मोठी फसवणूक असल्याचे सांगण्यात आले. प्रतीक घुगे यांनी दिलेल्या तक्रारीनुसार, 28 नोव्हेंबर 2024 रोजी त्यांच्या व्हॉट्सअ‍ॅपवर एक अनोळखी लिंकसह गेमिंग प्लॅटफॉर्मची जाहिरात आली. आकर्षक परताव्याच्या आमिषाने त्यांनी लिंकवर क्लिक करून खाते उघडले. सुरुवातीला त्यांनी 10 हजार रुपये गुंतवले, परंतु कोणताही नफा मिळाला नाही. त्यानंतर आणखी पैसे गुंतवत त्यांनी एकूण गुंतवणूक वाढवत नेली.