तुमची गाडी पंक्चर झालीये, थांबा! हायवेवर प्रवास करताना ही चूक करू नका, अन्यथा पश्चातापाची वेळ

महामार्गांवर गाड्या मोठ्या वेगाने धावत असल्याने एखादी गाडी थांबली तरी मदतीसाठी कोणी येत नाही. या परिस्थितीचा गैरफायदा घेत चोरटे प्रवाशांवर हल्ला करतात. अनेकदा हे चोरटे दुचाकीवरून येऊन वाहनचालकाला ‘गाडीच्या टायरमधून हवा निघाली आहे’ किंवा ‘पंक्चर झाले आहे’ असे सांगतात. प्रवासी गाडी बाजूला घेत थांबवतात आणि याच क्षणी चोरटे जवळ येऊन चाकू किंवा इतर शस्त्र दाखवून रोकड, मोबाईल, दागिने किंवा मौल्यवान वस्तू लुटतात.

गेल्या काही काळात महामार्गांवरील या नव्या लुटीच्या घटनांमुळे वाहनचालकांमध्ये भीतीचे वातावरण निर्माण झाले आहे. पोलिसांकडून गस्त वाढविण्याचे आणि सीसीटीव्ही देखरेखीची व्यवस्था अधिक मजबूत करण्याचे आश्वासन देण्यात आले आहे. तरीही नागरिकांनी प्रवासादरम्यान सतर्कता राखणे आणि कोणत्याही संशयास्पद हालचालीबाबत त्वरित पोलिसांना कळवणे हाच सुरक्षिततेचा सर्वोत्तम उपाय असल्याचे पोलिसांनी सांगितले.