Pune News: प्रचाराच्या घाईत अपघात! राष्ट्रवादी आमदाराच्या भरधाव मर्सिडीजनं शिरूरमध्ये 4 वर्षांच्या चिमुकलीला उडवलं

प्रत्यक्षदर्शींनी दिलेल्या माहितीनुसार, आमदार कटके हे वाघोलीहून शिरूरकडे त्यांच्या काळ्या रंगाच्या मर्सिडीज कारमधून जलद गतीने येत होते. बोऱ्हाडे मळा येथील हुंदाई शोरूमसमोर शुभ्रा बोऱ्हाडे ही बालिका अचानक एका दुसऱ्या कारच्या आडून महामार्ग ओलांडत होती. यावेळी ती थेट आमदार कटके यांच्या कारसमोर आली. चालकाने त्वरित ब्रेक दाबला, परंतु गाडीचा वेग जास्त असल्याने शुभ्राला जोरदार धडक बसली. धडकेमुळे ती चेंडूसारखी हवेत उडून काही फूट अंतरावर रस्त्यावर आदळली. या अपघातात तिला गंभीर दुखापत झाली असून, तिचे दात पडून जबड्याला जबर जखम झाली आहे.

आमदाराच्या कारने बालिकेला उडवल्याची बातमी संपूर्ण शिरूर शहरात पसरली असतानाही, पोलीस प्रशासनाने मात्र या घटनेची लपवाछपवी केल्याचा गंभीर आरोप होत आहे. 'घटनेबद्दल आम्हाला ना रुग्णालयातून खबर मिळाली, ना कोणी तक्रार करण्यासाठी आलं,' असं पोलिसांनी सांगितलं. शिरूर शहरात या प्रकारावरून 'आमदारांकडून पोलिसांवर दबाव टाकण्यात आला आहे का?' अशी चर्चा नागरिकांमध्ये रंगली आहे.