Pune: कोयता नव्हे आता पिस्तुल! पुण्यात अल्पवयीन गुन्हेगाराकडून गोळीबार, 2-3 राऊंड केले फायर; परिसरात खळबळ

पुणे : राज्याची सांस्कृतिक राजधानी असलेल्या पुणे नगरीमध्ये दिवसेंदिवस गुन्हेगारीच्या घटनांमध्ये वाढ होत चालली आहे. काल परवा पर्यंत कोयत्या घेऊन गल्ली बोळात दहशत पसरवण्याच्या घटना समोर आल्या होता. आता अल्पवयीन सराईत गुन्हेगार गोळीबार करत असल्याची घटना समोर आली आहे. दोन गटातून गुलटेकडी परिसरात गोळीबाराची घटना घडली आहे. या घटनेमुळे परिसरात खळबळ उडाली आहे.

पोलिसांनी दिलेल्या माहितीनुसार,  पुण्यातील गुलटेकडी परिसरात शुक्रवारी रात्रीच्या सुमारास गोळीबाराची घटना घडली.  अल्पवयीन सराईत आरोपीने गोळीबार केल्याची माहिती समोर आली आहे.  या अल्पवयीन सराईत गुन्हेगाराने हवेत दोन ते तीन राऊंड फायर केले असल्याची प्राथमिक माहिती देण्यात आली आहे. सुदैवाने या गोळीबार कुणीही जखमी झालं नाही.

घटनेची माहिती मिळताच पुणे पोलिसांनी घटनास्थळी धाव घेतली. घटनास्थळाची पाहणी करण्यात आली आहे. पोलिसांनी जेव्हा तपास केला असता दोन गटातील वादातून गोळीबार झाला असल्याची माहिती समोर आली आहे. आरोपीकडून परिसरात भीतीच वातावरण पसरवण्यासाठी हवेत गोळीबार केला. या गोळीबारात कुणीही जखमी झालं नसलं तरी दहशत पसरवण्यासाठी गोळीबाराची घटना घडल्यामुळे खळबळ उडाली आहे. या अल्पवयीन गुन्हेगारांकडे पिस्तुल, बंदुका येतात कुठून? हा मोठा प्रश्न निर्माण झाला आहे.

पुणे पोलीस घटनास्थळी दाखल झाले असून परिसरात बंदोबस्त वाढवण्यात आला आहे. ज्या अल्पवयीन गुन्हेगाराने गोळीबार केला, त्याच्याविरोधात गुन्हा दाखल करण्यात आला आहे. या अल्पवयीन गुन्हेगाराचाा शोध घेतला जात आहे.