रात्रीच्या अंधारात फुरसुंगीत दारूच्या नशेत आली 4 अल्पवयीन मुलं; हातात धारदार शस्त्रं अन् ते कांड, रहिवासी भयभीत

मिळालेल्या माहितीनुसार, मंगळवारी रात्री पावणेदहाच्या सुमारास हे चारही अल्पवयीन परिसरात आले. त्यांच्याकडे कोयत्यासारखी तीक्ष्ण शस्त्रे होती. मद्याच्या नशेत असलेल्या या मुलांनी आरडाओरडा करत परिसरातील नागरिकांना धमकावण्यास सुरुवात केली. दहशत निर्माण करण्याच्या उद्देशाने त्यांनी समोर येतील त्या वाहनांवर प्रहार केले.

या तोडफोडीमध्ये ३ रिक्षा, २ टेम्पो आणि ४ दुचाकींचं मोठं नुकसान झालं आहे. अचानक झालेल्या या हल्ल्यामुळे नागरिक भयभीत झाले आणि परिसरात पळापळ सुरू झाली. घटनेची माहिती मिळताच फुरसुंगी पोलीस ठाण्याचे वरिष्ठ पोलीस निरीक्षक अमोल मोरे यांनी तातडीने पथकासह घटनास्थळी धाव घेतली. पोलिसांनी याप्रकरणी चौघांविरुद्ध गुन्हा दाखल केला असून, पसार झालेल्यांपैकी एका अल्पवयीन मुलाला पोलिसांनी ताब्यात घेतले आहे. उर्वरित तीन साथीदारांचा शोध सुरू आहे. या घटनेचा पुढील तपास पोलीस उपनिरीक्षक विनोद पवार करत आहेत.