कात्रज–कोंढवा रस्त्याचे होणार काम, भूसंपादन शेवटच्या टप्प्यात, कसा आहे 710 कोटींचा मार्ग?

पुणे : पुणेकरांसाठी एक दिलासादायक बातमी आहे. कात्रज–कोंढवा रस्त्याच्या कामासाठी सुरू असलेली भूसंपादन प्रक्रिया आता जवळपास पूर्ण होत आली आहे. 50 मीटर रुंदीच्या रस्त्यासाठीचे भूसंपादन येत्या 15 दिवसांत पूर्ण होणार असून, त्यानंतर 15 मार्चपासून प्रत्यक्ष कामाला सुरुवात होणार आहे. या रस्त्याच्या कामासाठी सुमारे 710 कोटी रुपयांचा खर्च अपेक्षित आहे. सुरुवातीला हा रस्ता 84 मीटर रुंद करण्याचा प्रस्ताव होता. मात्र भूसंपादन प्रक्रियेत अडचणी आल्याने रस्त्याची रुंदी 50 मीटर करण्याचा निर्णय घेण्यात आला आहे. याबाबतची माहिती महापालिका आयुक्त नवलकिशोर राम आणि जिल्हाधिकारी जितेंद्र डुडी यांनी दिली.