Mahabharat: 5 पांडवांपैकी 'या' पांडवाची पत्नी होती जलपरी, तिनंच त्याला केलं होतं पुन्हा जिवंत!

असं म्हणतात की, द्रौपदी जी पाचही पांडवांची पत्नी होती, ती 1-1 वर्षभर प्रत्येक पांडवासोबत राहायची. महत्त्वाचं म्हणजे एका पांडवासोबत असताना दुसऱ्या पांडवांना द्रौपदीच्या आजूबाजूला फिरकण्याचीही परवानगी नव्हती. हा नियम मोडणाऱ्याला वर्षभर देशाबाहेर राहण्याची शिक्षा मिळत असे.

अर्जुन आणि द्रौपदीची वर्षभराची अवधी नुकतीच संपली होती आणि द्रौपदीचा युधिष्ठिरसोबत राहण्याचा कालावधी सुरू झाला होता. त्यावेळी अर्जुन चुकून आपलं तीर, धनुष्य द्रौपदीच्या घरीच विसरला. एका दुष्ट व्यक्तीपासून पशूंच्या रक्षणासाठी त्याला तीर, धनुष्याची आवश्यकता होती. क्षत्रिय धर्माचं पालन करत त्यानं तीर-धनुष्य घेण्यासाठी नियम मोडून द्रौपदीच्या घरात प्रवेश केला. त्यानंतर त्याला वर्षभर बाहेर राहण्याची शिक्षा मिळाली. यादरम्यान अर्जुनाची भेट उलूपीशी झाली. दोघं लग्नानंतर वर्षभर एकत्र राहिले, मग अर्जुन पुन्हा आपल्या राज्यात परतला.

उलूपीनं अर्जुनाला पाण्यात कोणत्याही हानीशिवाय राहण्याचं वरदान दिलं होतं. महाभारत युद्धात आपले गुरू भीष्म पितामह मारले गेल्यानंतर जेव्हा अर्जुनाला ब्रह्मा-पुत्राचा शाप मिळाला तेव्हा उलूपीनंच त्याला शापमुक्त केलं होतं. अर्जुनाचा अंत त्याचा पुत्र मणीपूर नरेश बभ्रुवाहन (चित्रांगदाचा पुत्र) याच्याद्वारे होताच उलूपीनं संजीवन मणिकाद्वारा अर्जुनाला पुनर्जिवीत केलं होतं. विष्णू पुराणानुसार अर्जुन आणि उलूपीचा इरावन नामक पुत्र होता. इरावनलाच तृतीयपंथी व्यक्ती देवता मानतात. उलूपी स्वर्गारोहणापर्यंत अर्जुनासोबत होती, असं म्हणतात.