देवीचा आवडता रंग कोणता? नवरात्रीत नऊ रंगाची कपडे का घालावीत? Video

नवरात्रीत जगदंबा मातेची उपासना केली जाते आणि देवीला लाल रंग जास्त प्रिय आहे. पण नवरात्रीत सांगितलेले नऊ दिवसाचे रंग परिधान करणे हा आवडीचा भाग आहे. संबंधित रंगाचे कपडे परिधान करून देवीच्या दर्शनाला गेल्यास एक वेगळी शक्ती दिसून येते. सर्व महिला एका रंगाच्या वस्त्रात बघून वातावरणात वेगळी ऊर्जा जाणवते. म्हणजे शक्ती जवळ शक्ती जाते. नवरात्रीत देवीची उपासना, आराधना, भक्ती, नामस्मरण, या गोष्टी केल्याने तुमची मनोकामना पूर्ण होईल आणि तुमच्या मागे आई जगदंबेचा आशीर्वाद राहील. त्यामुळे वास्तविकतेत आई जगदंबा देवीची पूजा करून स्वतःचे मन प्रसन्न ठेवणे जास्त महत्त्वाचे ठरेल, असे महाराज सांगतात.

नवरात्रीच्या नऊ दिवसांमध्ये सांगितलेल्या नऊ रंगांपैकी तो रंग तुमच्याकडे असेल तरच ते वस्त्र परिधान करा. अन्यथा मार्केटमध्ये जाऊन त्या रंगाचे वस्त्र खरेदी करून आणण्याची आणि खर्चात पडण्याची गरज नाही. त्याच पैशांनी आई जगदंबेच्या पूजेचे साहित्य, तिच्या हार, फुलावर खर्च केले तर फायदा होईल, असे महाराज सांगतात.

नवरात्रात सर्व महिलांनी सांगितलेल्या रंगांचे कपडे किंवा साडी परिधान केली तर नवरात्री उत्सवाचा एक वेगळा आनंद आणि समाधान सर्वांच्या चेहऱ्यावर दिसते. महिलांमध्ये सामाजिक एकता दिसून येते. त्यामुळे या रंगांमागे उत्साह आणि आनंद हे कारण असू शकतं. मात्र जगदंबेला अंबाबाईला लाल रंग जास्त आवडतो. नवरात्रीचे नऊ दिवस शक्यतो काळा रंग टाळून इतर सर्व रंग आपण परिधान करूच शकतो, असं महाराज सांगतात. जर तुमच्याकडे नऊ दिवसांच्या त्या रंगाची साडी किंवा वस्त्र नसेल तर नवीन खरेदी करण्याचीही गरज नाही, असेही हेमंत पाचखेडे महाराज सांगतात.